Miguel Ángel Blanco Fundazioko burua, Galdakaoko PPren bigarren

TESTUA: Irati Alonso García
ARGAZKIA: José Ramón Ladra

Mari Carmen Sánchez izango da Galdakaoko PPren zerrendaburua maiatzaren 28an antolatuko diren udal-hauteskundeetan. Zerrendaren bigarren postuan aldiz, Cristina Cuesta Miguel Ángel Blanco Fundazioko presidentea aurkeztuko dela iragarri du alderdiak.

Maiatzaren 28an antolatuko diren udal-hauteskundeetan Galdakaoko PPren alkategaia izango dela iragarri zuen Mari Carmen Sánchezek otsailean, Binkek jaso zuen moduan. Orain berarekin batera alderdiaren zerrendan bigarren postuan Cristina Cuesta Miguel Ángel Blanco Fundazioko presidentea aurkeztuko dela ezagutzera eman du taldeak.

Arovitek azaltzen duenez, «Cristina Cuesta ETAk hildako Enrique Cuesta Telefónicaren Gipuzkoako ordezkariaren alaba da». Filosofian lizentziatua eta Kriminologian masterraduna, gaur egun Miguel Ángel Blanco Fundazioko presidentea da.

Aurretik Bakearen Aldeko Elkartearen eta Coviteren sortzailea izan zen, eta baita Gesto por la Paz, Denon Artean eta Ermuko Foroaren sortzaileetako bat ere.

Mari Carmen Sánchezek sareetan publikatu duenez, Galdakaoko PP «oso harro» dago zerrendan Cristina Cuesta aurkezteaz.