WhatsApp kanal berria abiatuko du Galdakaoko Udalak, informazioa eskaintzeko
TESTUA: Irati Alonso García
ARGAZKIA: BINKE
Herritarrei informazioa modu «zuzenean eta irisgarrian» eskaintzeko helburuz, WhatsApp kanal berria abiatuko du Galdakaoko Udalak. Kanala astelehenean jarriko da martxan baina harpidetza egin daiteke honezkero albiste honetan batutako estekan.
Galdakoztar guztiei gertuko informazioa modu «azkarrean, zuzenean eta irisgarrian» eskaintzeko asmoz, Galdakaoko Udalak bere WhatsApp kanal berria jarriko du martxan.
Kanal honen bidez, telefono mugikorrean albiste garrantzitsuak, nobedadeak, premiazko abisuak, ekitaldiak eta abar zuzenean jaso ahal izango dira. Horri esker, «Udalaren eta galdakoztarren arteko harremana hurbilagoa, gizatiarragoa eta arinagoa» izango da. «Gainera, horrek gai publikoetan parte hartze aktiboagoa ere sustatuko du», azaldu dute Udaletik.
Kanala astelehenean, otsailak 3, jarriko du martxan Udalak baina honezkero harpidetza egin daiteke esteka honetan edo ‘Galdakaoko Udala’ bilatuz WhatsAppeko kanalen artean.
Erregistroak ez du erabiltzaileen pribatutasuna arriskuan jartzen, ez baita datu pertsonalik partekatzen. Gainera, edozein parte hartzailek jakinarazpenak isilarazi edo zerbitzu honetan baja eman ahal izango du kanalaren beraren profiletik edozein unetan.
