Torrezabal Kultur Etxeko bazkideek honezkero deskontu-bonoak jasotzeko aukera dute

TESTUA: Irati Alonso García
ARGAZKIA: Jon Gomez Garai

Aurtengo deskontu-bonoak jaso ahal dituzte dagoeneko Torrezabal Kultur Etxeko bazkideek. Aretoan bertan eskuratu daitezke astelehenetik ostiralera goizez eta arratsaldez, eta asteburuetan ikuskizunak hasi baino lehen.

Ekainera bitarte Torrezabal Kultur Etxean hamazortzi ikuskizun iragarri zituen Galdakaoko Udalak, Binkek jasotako moduan. Saio hauen sarrerak salgai daude aretoan eta webgunean eta aretoko bazkideek deskontuak dituzte prezioan.

Horretarako, deskontu-bonoak jartzen dituzte eskuragai eta dagoeneko bazkideek hauek jaso ahal dituztela ezagutzera eman du Udalak. Astelehenetik ostiralera egin daiteke 10:00etatik 14:00etara Kultura arloan edo 15:30tik 20:00etara Torrezabaleko atezaintzan.

Halaber, asteburuetan eta jai egunetan txarteldegian jaso ahal dira, zinea hasi baino ordu erdi lehenago eta antzerkia hasi baino ordubete lehenago.

Bazkideek %25eko deskontua dute zuzeneko ikuskizunetan eta erosteko lehentasuna dute denboraldi bakoitzaren hasieran. Bazkide + direnek aldiz, honetaz gain, 2×1 kupoi bi jasotzen dute iragarritako ikuskizunetarako eta zortzi gonbidapen zinema saioetarako.