Sormene
BINKE / 2020ko abendua

Lehenenego reggeatoi euskalduna ekarri du Kai Nakaik Sormenera

TESTUA: Beñat Armentia Arriandiaga
BIDEOA: Binke

«Emakume sortzaile euskaldunak egungo kantagaintzan» ardatz izan duen arratsalde honetan, J. Martinarekin hasi, Haizea eta Ningrarekin jarraitu, eta eguna biribiltzeko Kai Nakairen txanda izan da azkenik. Gasteiztarrak sutan jarri du antzokia reggaetoiaren bitartez!

Iratxe Aguilera da Kai Nakai. Gasteiztarra da bera, eta iazko Durangoko Azokako beka eskuratu ostean, bere lehen diskoa kaleratu berri du musikariak: «Baimenik gabe». Besteak beste, Mikel Urdangarin, Jon Maia, Xsakara, STR eta Duplaren kolaborazioak izan ditu lan berri honetan, eta euskal musikan orain arte egon ez den estilo berritzaile bat eskaintzea du helburu. Reggaeton musika da proposamenaren oinarria, eta zera dio abeslari gazteak: «Musika genero honi letra matxistek lagundu diete bereziki, baina bestelako estilo hau ere existitzen da, musika berez matxista ez delako». Horregatik bere hitzek kolektibo guztiak kontuan hartu eta errespetatzen ditu.

Duela urte erdi argitaratu zuen bere lehen single-a, «Kolpe», eta bere ezusterako, itzelezko oihartzuna izan zuen kanta honek, pozarren dago abestiak jasotako harrerarekin eta batez ere hedapenarekin. Datu batzuk ematearren, 50.000 ikustaldi izan ditu YouTuben daborduko, 60.000 aldiz Spotify-en. Gaua estudioan ekoitzi eta grabatu du diska, eta han prestatu du zuzenekoa ere bai, baina, online plataformen bidez publikoaren erantzuna jaso badu ere, hau izan da bere bigarren zuzenekoa, orain arte ez baitu honetarako aukerarik izan. Duela bi aste inguru aritu zen estreinakoz Durangoko Azokako Plateruenan.

Eskainitako emanaldian, DJ bat eta bi dantzari izan ditu abeslariak lagun agertokian. Dantza, mugimendua, erritmo bizi eta alaiez beterikoak, eta halako beste hainbeste, Euskal Herrian baino, euskal musikan oraindik guztiz digerituta ez dagoen reggaetoia izan da erabilitako musika genero ikuskizun osoan zehar. Letrei dagokionez, hainbat izan dira jorratzen dituen gaiak, baina, batez ere maitasunarekin izandako gora-beherak, batez ere harreman hautsiak ditu hizpide. Hala ere, Euskal Herria «sutan» jartzea, edota dena astintzeari buruz hitz egiten dute bere kantek ere, edota euskal musikaren baitan olatu berri bat datorrela ere aipatzen du tarteka. Honetarako, doinu ilun eta dantzagarriez hornitzen ditu letra hauek, eta dantzen eta koreografia desberdinen bitartez bizitasuna ematen dio bere kantei.

Bihar izango da Sormeneren azken aurreko eguna. Euskal kulturaren eta sormenaren plaza berriak oraindik badu eskaintzeko asko, eta hainbat izango dira goizez zein arratsaldez oholtza gainera igoko direnak. Gaurkoan musika izan bada ere protagonista, bihar literatura. Goizean Jabi Elorza, Karlos Gorrindo, Miren Amuriza eta Eider Eibar, eta Miren Agur Meabe izango dira. Arratsaldez, aldiz, Yolanda Arrieta, Mikel Begoña, Asel Luzarraga eta Peru Magdalena.

Eñaut Elorrietak biribilduko du eguna kontzertu zoragarri bat eskainiz, bere azken diska aurkezteko.

Hurrengo saioak ere streaming bidez baino ezin daitezke jarraitu, eta Binkeren webguneko hasiera-orritik egin daiteke klik bakarrean.