Musika Bizian jaialdia urriaren 27 eta 28an antolatuko da bederatzigarrenez Galdakaon

TESTUA ETA ARGAZKIA: Irati Alonso García

Estaturik gabeko herrialdeen musika jaialdia urriko azken asteburuan antolatuko du bederatzigarren urtez Andra Mari Dantza Taldeak Iturrondo plazan. Besteak beste, Kornualleseko, Bretainiako, Kosovoko eta Euskal Herriko taldeak arituko dira. Hemen batu du BINKEk egitarau osoa eta taldeen inguruko informazioa.

Bederatzigarren urtez helduko da Galdakaora Andra Mari Dantza Taldeak, Udalaren eta Bizkaiko Foru Aldundiaren babesarekin, antolatutako Musika Bizian jaialdia. Estatu propiorik gabeko herrialdeen taldeak batzen dituen hitzordua urriaren 27an eta 28an izango da da aurten.

Euskal Herriaren egoera parekoan edo antzekoan dauden kulturak musikaren bitartez ekarriko ditu beste urte batez herriko dantza taldeak Galdakaoko Iturrondo plazan jarriko den karpa handira. Aurten Kornualles, Bretainia, Kosovo eta Euskal Herriko taldeak izango dira oholtzan.

Halaber, ohi denez, kontzertuak hasi aurreko orduetan kaleko animazioa izango da eta zapatu eguerdian artisauen azoka eta tailerrak ere izango dira. Hori gutxi ez, jateko eta edateko aukera izango da Iturrondon.

Gaur aurkeztu dute jaialdiaren bederatzigarren edizio hau Iñigo Hernando Galdakaoko alkateak, Leixuri Arrizabalaga Bizkaiko Foru Aldundiko kultura foru diputatuak, eta Unai Zabala, Garazi Maeso eta Garatz Unamunzaga Andra Mari dantza taldeko kideek.

Hernandoren hitzetan «estaturik gabeko herrialdeentzat erreferente den jaialdia da Musika Bizian eta espero dugu urtero legez beste kulturetatik ikasteko aukera izatea aurtengo edizioan». «Musika unibertsala da eta horregatik estaturik gabeko herrialdeen aniztasuna eta aberastasun kulturala ospatzea esangura handia du», nabarmendu du Arrizabalagak.

Aniztasun horren isla izan nahi du Musika Bizian jaialdian eta horretarako egitarau zabala prestatu dute aurten ere. Hemen jaso dugu:

Urriak 27, barikua
19:00 Taberna ibiltaria Santi Brouard enparantzatik
21:30 The Stowes (Kornualles) eta Gozategiren (Euskal Herri) kontzertuak

Urriak 28, zapatua
12:00 Luthier Azoka eta musika erakustaldia
19:00 EinGO taldearekin kale animazioa Iturrondo plazako karpatik
21:00 Startijenn (Bretainia), Gipsy Groove (Kosovo) eta Mconak (Euskal Herria) taldeen kontzertuak

Taldeak ezagutu

THE STOWES (Kornualles)
Folk tradizionalaren nahasketa bizigarri bat jotzen duen banda zelta da, batez ere kornualleseratik,
irlandarretik eta eskoziarretik edaten duena. Azken 6 urteotan, The Stowes taldeak mundu osoan jo du, pianoko akordeoia, bouzoukia, 5 hariko banjo tenor pedal efektuduna uztartuz. The Stowesek Kornualleseko musika berrasmatu eta munduari aurkeztu dio urte hauetan guztietan.

GOZATEGI (Euskal Herria)
1992. urtean hasi zen osatzen gaur egun ezagutzen dugun moduan. Aurretik, Asier eta Ainhoa Gozategi anai-arrebak ezagunak ziren trikitiva munduan zenbait erromeri eta lehiaketetan aritaen baitzirelako. 1992 urtean Inigo Goikoetxea ezagutu zuen bikoteak eta beraien erromeri moldatzen hasi ziren. 1994. urtean beraiek ekoiztutako maketa bat kaleratu zuten, arrakast handia lortu zutelarik: 2000 ale saldu zituzten uda bakar batean. Kontzertu eta erromeri kopuru handitzen hasi zen orduan. Ordutik hona, hogeita hamar urte baino gehiago, zazpi diska e ehundaka kontzertu eman dituzte. Urte hauetan guztietan dagoeneko ereserki bihurtu diren abestien egilea da Gozategi: ‘Nirekin’, ‘Kalanbreak’, ‘Nor Nori Nork’,edo ‘Porru Patata’.

STARTIJENN (Bretainia)
Musika tradizionala ardatz, bretoien instrumentu ikonikoz eta erritmo indartsuz hornitutako ikuskizuna eskaintzen dute. Euren lurraldean ezagunak dira dagoeneko; hala ere, oraindik lurralde musikal berriak esploratzen aritzen dira, euren kultura nazioarteko eszenatokian erakusteko. Taldeak bere zazpigarren albuma, ‘Talm ur galon’ (Bihotzaren taupadak), apirilean argitaratu zuen, rockaren eta folkaren nahasketa tradizional batekin.

GIPSY GROOVE (Kosovo)
2010az geroztik desberdintasunari, mugitzekoaskatasunari, arrazakeriari, emakumeen eskubideei eta, oro har, giza eskubideei buruzko kontzientzia sortzea dute helburu. Euren lana Kosovoko eta Balkanetako bizitza errealaren irudikapen artistikoa da, sufrimendu eta alaitasun interakzio amaigabearekin. Euren estilo propioa Balkan Romani musika eta Balkan Folk estiloak Jazz, Reggae,Funk, Ska, Drum & Bass elementuekin konbinatuz erabiltzen dute. Haien emanaldiak ezagunak dira atmosfera biziagatik, ikusleekin elkarreragin handia izateagatik eta elementu inprobisatzaileengatik.

MCONAK (Euskal Herria)
2011n Lekeition sortutako rebel folk taldea da. Whistle, soinu, banjo eta ohikoagoak diren rock instrumentuez lagunduta, folkean oinarritu eta beste hainbat estilo lantzen dituzte. Folka malenkonia eta adorea da, herriaren kanta delako, hitzetan ere malenkoniaz gain, (auto) kritika zorrotza egiten diete beraien buruei eta beste hainbat konturi. 2012ko udaberrian lehen lana grabatu zuten, ‘McEta’ izena jarri ziotena, eta hogeita hamar kontzertutik gora eskaini zuten Euskal Herri osoan zehar. 2013ko udazkenean estudioko lehen lan luzea grabatu zuten, ‘Piraten Matxinada’; 2015ko udazkenean ‘Galarrena’ izeneko estudioko bigarren lana grabatu zuten eta 40 kontzertutik gora eman zituzten. 2018an taldea eraberritu eta ‘Gure Naufragioak’ diska kaleratu zuten beraien doinuak berroigeita hamar portutara eramanez 2019ko biran. 2020. urtean, aldiz, taldeak itsaso berriak nabigatu eta 2021ean ‘Bitakora’ plazaratu zuen, taldearen 10. urteurrena ospatzeko.