Usansoloko ospitaleak erradiodiagnostiko zerbitzua berritu du

TESTUA: Irati Alonso García
ARGAZKIA: Europa Press

Usansoloko ospitaleko erradiodiagnostiko zerbitzuak instalazioak eta ekipamendua berritu ditu, sarbidea eta eskaintzen dituen prestazioak hobetuz. Guztira 732.434,26 euroko inbertsioa egin dute eta obra osoa udarako amaitzea aurreikusi dute.

Osakidetzak Usansoloko ospitalearen erradiodiagnostiko zerbitzua berritu du. Irisgarritasuna hobetzeko helburuz, zerbitzuaren sarreran ate automatikoa jarri da eta itxarongelako guneak bereizten zituzten trenkadak kendu dira. Halaber, profesionalentzako aldagela berriak egin dira.

Bestalde, hirugarren gelan telekomando digitala instalatu dela azaldu du Osakidetzak. Horretarako, espazio guztiak birbanatu dira eta instalazio-elektriko guztia aldatu. Gela telekomandoaren funtzionamenduak eskatzen dituen dimentsioekin birkonfiguratu da, inguratzaile guztia beruneztatuta eta erradiaziotik babestuta utziz. «Airea girotzeko eta berritzeko instalazioa ere eraberritu da, espazio berrietara eta zerbitzuaren eskakizunetara egokituz», adierazi dute Osasun Sailetik.

Seigarren gelan aldiz, Canonen Ultimax-i modeloko telekomando xedeanitz modernoa ezarri dute, Osakidetzan ezaugarri horietako lehena. «Telekomando horren abantaila handienetako bat da, mahaiari erantsitako C arkuari esker, x-izpien hodiaren kokapena alderantziz jartzeko aukera dagoela eta, hortaz, prozedura interbentzionista inbaditzaileak egin daitezkeela, batez ere diagnostikoak egiteko», nabarmendu dute.

Bestalde, Hologic mamografo berria jarri dute, puntzio mamografikoko funtzioak dituenak eta egungo estereotaxia-mahaia ordezkatu duenak.

Guztira 732.434,26 euroko inbertsioa egin dute, eta obra osoa udarako amaitzea aurreikusten du Osakidetzak.