Bilbotik Galdakaorako bidegorriaren aldeko XVIII. martxa bihar izango da
TESTUA: Irati Alonso García
ARGAZKIA: Biziz Bizi elkartea
Bihar, maiatzak 27, Bidegorria Galdakaora Orain ekimenaren XVIII. martxa antolatu du Biziz Bizi elkarteak, Bilbo eta Galdakao batzen dituen bidegorria eskatzeko. Ibilbidea goizeko 11:00etan hasiko da hiriko Bizkaiko Foru Aldundiaren eraikinetik.
Hainbat hilabetetan zehar egin duen moduan, Biziz Bizi elkarteak Bilbo eta Galdakao batzen dituen bidegorria eskatzen jarraitzen du. Orain arte hainbat martxa antolatu dituzte, eta bihar berriz egingo dute bi herriak batzen dituen ibilbidea.
Bidegorria Galdakaora Orain ekimenaren XVIII. martxa goizeko 11:00etan irtengo da Bilboko Foru Aldundiaren eraikinetik (Gran Vía kalea, 25). Ohi den bezala, Etxebarri eta Basauritik igaroko dira, eta azkenik Galdakaora helduko dira. Ibilbidean zehar trena edo metroa hartzeko aukera izango dute parte-hartzaileek.
«Martxa berri hau hilaren 28ko hauteskundeetarako hausnarketa-egunean tokatzen zaigu. Hori egiteko modurik onena bizikleta gainean ibiltzea da, eta mugikortasun iraunkorrari eta etorkizuneko proiektuei buruz agindu diguten guztia pentsatzea. Espero dugu hauteskundeen ondoren ez ahaztea», aldarrikatu dute Biziz Bizi taldetik, parte-hartzera animatuz. «Orain bai, lor daiteke! Anima zaitezte, zabaldu eta parte hartu», azpimarratu dute.
