EAJk Usansoloren segregazio prozesuaren egoera ezagutzeko bilera eskatu dio Galdakaoko alkateari

TESTUA: Irati Alonso García
ARGAZKIA: BINKE

EAJ-PNVk Iñigo Hernando alkateari bilera informatiboa eskatu dio, Usansoloren segregazio prozesuaren egoera ezagutzeko. Gobernu taldeak bide-orri bat prestatzea proposatuko diote jeltzaleek, horrela, «legez Galdakaoko Udalari dagokionean urrats eraginkorrak emateko».

EAJ-PNVk Iñigo Hernando alkateari bilera informatiboa eskatu dio Usansoloko segregazio prozesuaren inguruko informazioa ezagutzeko. Alderdiare esanetan, egungo eta etorkizuneko egoerari buruzko informazioa eta prozesuan aurrera egiten jarraitzeko dauden aukerei buruz galdetuko dio alkateari.

Jeltzaleek gobernu taldeak bide-orri bat prestatzea proposatuko dute bileran, horrela, «legez Galdakaoko Udalari dagokionean urrats eraginkorrak emateko, inplikatutako eragile guztiekin egindako bileraren bidez».

«Gobernu taldetik orain arte jasotako informazioa oso eskasa eta nahiko kontraesankorra izaten ari da, eta, beraz, beharrezkoa ikusten dugu puntu garrantzitsuak eta beharrezkoak argitzea prozesuak aurrera egin dezan», azpimarratu dute EAJ-PNVtik.

«Galdakaoko Udalak betetzen duen papera garrantzitsua da, aurrerapenak eraginkorrak izan daitezen, aurrekontuak bereizteko aukerari, funtzionarioen lekualdatzeari, zerbitzu hitzarmenen balorazioari, eta abar hartu behar baitira», azaldu dute.