Ertzaintzak Maxameko langile bat identifikatu du, polizia bideoz grabatzeagatik
Lan-gatazka
BINKE / 2022ko martxoa
Ertzaintzak Maxameko langile bat identifikatu du, polizia bideoz grabatzeagatik
TESTUA: Jon Gomez Garai
ARGAZKIA: Aitzol Zamalloa
Atzo eta gaur artean, greba mugagabean dauden Maxameko langileen inguruan ertzainen presentzia nabarmen igo da berriz. Horixe «modu umoretsuan» salatzeko bideoa grabatu zuen atzo langileetariko batek, eta gaur horrexegatik identifikatu dute ertzainek. Langilearekin hitz egin dugu, baita berak grabatutako bideoa argitaratu ere.
Maxameko langile grebalariek lanuztearen 29. eguna bete duten honetan, gaur martxoak 16, Ertzaintzak langile bat identifikatu du. Identifikazioaren arrazoia, langile honek Binkeri aitortutakoaren arabera, atzo poliziak hedatzen eta kokatzen ari direla bideoz grabatu eta haurren musika jarri izana omen da.
Identifikazioa gaur eguerdian izan da, 14:00 aldera, «gaur be eurek grabatzen nabilela, bi ertzain nigana hurreratu eta eurekaz errepidearen beste aldera joateko eskatu deustienean», kontatu dio langile identifikatuak hedabide honi. Langilearen hitzetan, errepidearen beste aldera eraman dutenean zera esan diote ertzainek: «Ertzainburuei iritsi jakie zuk atzo grabatutako bideoa eta ez jakie bape gustatu».
Grebalariak ertzainen aurka «ezer esan ez» duela helarazi du, eta gaineratu: «Nik eurek zelan kokatzen diran baino ez dot grabatu, eta horren gainetik gero pailazoen musika bat baino ez dot jarri, ezin badogu umorez hartu, akabo!». Identifikatu eta gaur ere bigarren bideo bat igo du langile berak, antzeko musika batekin.
Atzo eta gaur grabatutako bideo hauen motiboa ez da hutsetik etorri, alegia, Ertzaintzaren presentzia nabarmen handitu delako berriz; «grebaren hasierako egunetara», bertako langileen iritziz. «Atzo eta gaur 10 unitate dagoz egun bakoitzean, eta euretariko asko istiluen aurkako unitatekoak dira», kontatu dio beste langile grebalari batek Binkeri.
Hau izan zen atzo identifikatutako bideoa:
Martxoaren 10ean Binkek argitaratutako azken barne-dokumentuen ostetik Enpresa Batzordeak ez du momentuz beste proposamenik jaso zuzendaritzaren eskutik, baina bilerak egiten ari direla onartu diote medio honi, eta Maxameko SIX sindikatu independenteko kideek aurreratu ere: «Ikusiko dozue zelan laster beste bozketa bat egin behar izango dogun, grebagaz jarraitu ala ez erabakitzeko».
Bozketekin «langileak banatzen eta elkarren aurrean jartzen» ari direla diote greban jarraitu gura duten langile batzuek, «baina sindikatu nagusiek hala erabakitzen badabe, guk bozketa onartuko dogu, zelan ez».
Jarraituko du Binkek lan-gatazka honen berri ematen.
