Euskal mitologia landuko dute bihar antolatuko den urteko lehen Barikupasa saioan

TESTUA: Irati Alonso García
ARGAZKIA: Guraso.eus

Gabonetako oporraldiaren ostean, bihar, urtarrilak 31, antolatuko dute urteko lehen Barikupasa saioa. Haur eta helduen arteko harremanetan euskara bultzatzea izango da saioaren helburua eta euskal mitologia landuko dute.

Haur eta helduen arteko harremanetan euskara sustatzeko helburuz sortu zen Barikupasa ekimena eta Gabonetan egindako etenaldiaren ostean, Galdakaoko Udalak, Bagabiz euskara elkartearekin eta herriko ludotekekin elkarlanean, urteko lehen hilabeteetako egitaraua iragarri du.

Urteko lehen saioa bihar, urtarrilak 31, izango da 17:00etan Kurtzeko Plazan eta euskal mitologia izango da landuko duten gaia. «Bertaratzen diren familiek zain izango dituzte musika eta pista jolasak, baita amuletoak eta eguzkiloreak egiteko tailerrak ere», azaldu dute Udaletik.

Bigarren saioa otsailaren 21ean izango da Urretan eta hirugarrena aldiz martxoaren 28an Kurtzeko plazan berriz.

Ekimenean parte hartzea doakoa da, baina familiek aurretik izena eman beharko dute. Bertan, guraso eta tutoreen zein umearen izen abizenak, kontaktua eta gurasoek jokatuko duten rola (ahobizi edo belarriprest) zehaztu beharko dira.

Aurrez internet bidezko galdetegian edo ekitaldia gauzatu aurretik lekuan bertan apuntatzeko aukera egongo da. Barikupasan 3 eta 11 urteko umeek parte hartu ahal izango dutela.