Kolon-ondesteko minbizia tumorerik ohikoenetakoa da, baina aldi berean garaiz detektatuz gero pronostikorik onenetakoa duenetakoa. Horregatik, 50 eta 74 urte bitarteko pertsonei detekzio programan parte hartzeko deia egin die Galdakaoko Udalak, Bizkaiko Minbiziaren Aurkako Elkartearekin eta Osakidetzarekin elkarlanean.
Prebentzioa eta detekzio goiztiarra bizitzak salbatzeko funtsezko tresnak dira, eta are gehiago koloneko eta ondesteetako minbiziaren kasuan. Izan ere, tumorerik ohikoenetakoa da, baina aldi berean garaiz detektatuz gero pronostikorik onenetakoa duenetako bat.
Horregatik, Galdakaoko Udalak, Osakidetzarekin eta Bizkaiko Minbiziaren Aurkako Elkartearekin lankidetzan, 50 eta 74 urte bitarteko herritarrei koloneko eta ondesteetako minbiziaren detekzio goiztiarreko programan parte hartzearen garrantzia gogorarazi die.
Gaur egungo parte-hartzea Galdakaon %78 ingurukoa da, datu altua, eta datozen urteetan kopurua handitzen jarraitzea da helburua. Ildo horretan, Osakidetzak emandako azken datuen arabera, 2023an emaitzen %4,07 positiboak izan ziren. Horrek «agerian uzten du baheketa prozesuen garrantzia detekzio goiztiarrean».
Amets Iturbe Gizarte Ekintzako zinegotziak mezu horretan sakondu du: «Detekzio goiztiarrak tratamenduak errazten ditu, pronostikoa eta biziraupena hobetuz». Horregatik, 50 eta 74 urte bitarteko Galdakaoko herritar guztiak animatu ditu proba egitera.
Proba erraz egiten da etxean, higienikoa da, erosoa, arriskurik gabekoa eta ez du aurretiko hitzordurik behar. Herritarrek etxean gutun bat jasotzen dute jarraibideekin eta beharrezko materialarekin, eta lagina hartu ondoren, osasun zentrora eraman behar dute.
Emaitzak SMS bidez eta gutun bidez jakinarazten dira, eta beharrezkoa bada, azterketa proba osagarriekin osatzen da diagnostikoa baieztatzeko.
