«FIFAk futbolaren arima saldu du», Haizea Cerrada
IRITZIA
Haizea Cerrada
BINKE / 2022ko abendua
Sei kirolari galdakoztar gonbidatu ditu Binkek domekan amaituko den gizonezkoen Qatarko futbol Mundialaren harira duten iritzia ematera. Horren baitan dago ondoko iritzi hau kokatuta.
Qatarreko Estatua munduko futbol txapelketa baterako egoitza aukeratzeak futbol modernoak hartu duen bide arriskutsua sinbolizatzen du. Ni, futbolzalea naizenez, gezurra esango nuke partidak ikusten ez ditudala esaten badut, baina aitortu behar dut nire buruan eztabaida gehien sortzen ari den mundiala dela.
Herrialde arabiar honek ez deko inolango futbol-tradiziorik, hala ere, hitzordu berezi honetarako futbol zelai guztiak eraiki behar izan duen herrialdea dugu aurrean. Hiri berri bat sortu dute ere, Lusail. Harrigarria, benetan. Datuekin jarraitzen badugu, futbol ikuskizunik handiena egoitzeko bide bazterrean utzi zituen Japonia edo Estatu Batuak, adibidez. Non dago desberdintasuna?
FIFAk futbolaren arima saldu dio gutako asko ongietorriak izango ez ginatekeen herrialde bati. Qatarren aukeratzearen zergatia aztertzen ari garen bitartean, munduko txapelketa hau ikusi ala ez eztabaidatzen ari garen bitartean, FIFA billete-sortak zenbatzen dabil oraintxe bertan, «futbol modernoari» ongi etorria emanez eta munduko txapelketa honek eraman dituen 6.000 arimak gogoratu gabe.
