Gabonetako txapelketa soziala antolatuko du bihar Adiskide Pilota Elkarteak

TESTUA: Irati Alonso García
ARGAZKIA: Esku Pilota Eskola

Bihar, abenduak 22, Gabonetako txapelketa soziala antolatuko du Adiskide Pilota Elkarteak Kurtzea pilotalekuan. Talde galdakoztarreko eta Basauriko Bidebideta pilota eskolako gazteenek parte hartuko dute hitzorduan eta ostean zozketak eta txokolatada izango dira, besteak beste.

Hainbat eta hainbat ekintza izango dira Gabonetan Galdakaon eta Usansolon, batez ere txikienei zuzenduak. Udalak eta eragileek hainbat hitzordu antolatuko dituzte egun hauetan zehar, BINKEk jaso zuen moduan.

Adiskide Pilota Elkarteak ere ilusioz betetako aro hau ospatu nahi izan du eta horretarako Gabonetako txapelketa soziala antolatuko du bihar, abenduak 22, Kurtzea pilotalekuan.

Lehiaketa 16:30ean hasiko da eta talde galdakoztarreko eta Basauriko Bidebideta pilota eskolako gazteenek parte hartuko dute, zehazki, gaztetxoek, benjaminek, alebinek eta haurrek.

Txapelketaz gain, zozketak, opariak eta musika izango dira, eta baita txokolatada. Hitzorduaren ondoren argazki guztiak ikusi ahal izango dira Adiskide Pilota Elkartearen sareetan.