Gaur piztuko dira Gabonetako argiak Galdakaon
TESTUA: Irati Alonso García
ARGAZKIA: Galdakaoko Udala
Galdakaok gaur, abenduak 5, emango die hasiera Gabonei, hirigunea eta auzoak apainduko dituzten argiak piztuz. Urtarrilaren 6ra arte egongo dira piztuta, 18:00etatik 08:00etara.
Gaur, abenduak 5, piztuko dira Galdakaoko hirigunea eta auzoak apainduko dituzten Gabonetako argiak. Hauek 2025eko urtarrilaren 6ra arte egongo dira, Hiru Erregeen jaieguna igaro arte, 18:00-08:00 ordutegian.
Urtero bezala, girlandak, irudiak eta bestelako apaingarriak izango dira ikusgai, hala nola, Ardantza Parkean jarritako oreinak eta bola handi argiztatua. Halaber, Iturrondo plazan zuhaitz berri bat jarri du Udalak eta urtero bezala argi berri batzuk ere erosi ditu kaleak apaintzeko.
Argiak, ohikoa den bezala, led motatakoak dira. Teknologia honek ez du argindar askorik behar nahikoa argi emateko. «Beraz, ez da gastu ekonomiko handirik bideratuko ekimen honetara», adierazi du Udalak.
