Torrezabal Kultur Etxeko areto nagusia eraberritzeko lanak hasiko dituzte hurrengo astean
TESTUA ETA ARGAZKIA: Irati Alonso García
Torrezabal Kultur Etxeko areto nagusia eraberritzeko lanak egingo dituzte 2024an. Hurrengo astean hasiko dira eta irauten duten bitartean aretoa itxita egongo da. Programazioak aldiz ez du etenik izango eta egitarau berezia antolatu du Udalak urteko lehen hilabeteetarako.
Urte hasierarekin batera aldaketak helduko dira Torrezabal Kultur Etxera, izan ere, areto nagusia eraberritzeko lanak hasiko dituzte hurrengo astean. Obrek hamar asteko iraupena izango dute eta gaur azaldu dituzte hauen nondik norakoak aretoan bertan Edurne Espilla zinegotziak, Katrin Schlegel Torrezabaleko programatzaileak eta Irune Pagaldai obra, proiektu eta informazioko arkitekto teknikoak.
Espillak azaldu duenez, pasa den urteko abenduan aldatu behar izan zuten areto nagusiko zorua arazoak ematen zituelako eta behin behineko bat jarri zuten. Aldaketa hau egitean konturatu ziren beste hainbat elementu hobetu behar zirela eta aretoa eraberritzeko erabakia hartu zuten. «Esaterako, kanpoko soinua entzuten da eta erosotasun falta dago hainbat lekutan», adierazi du zinegotziak.
Hauek eta beste hainbat alor hobetzeko obrak egingo dira hortaz Torrezabaleko areto nagusian. Pagaldaik azaldu duenez, moketako zoru berria jarriko da, eserlekuak berriztuko dira, isolamendu akustikoa jarriko da eta suteen aurkako hainbat neurri ezarriko dira, besteak beste.
«Eserlekuen kasuan eta plangintza osoan inklusiboagoak izatea bilatu dugu», nabarmendu du Espillak. Horreterako, zabalera berezi eserlekuak izango dira, eta baita gurpildun aulkientzako lekuak eta mugikortasun arazoak dituztenentzat. Halaber, entzumen eta ikusmen arazoak dituztenentzako eserleku bereziak.
Obrek irauten duten bitartean areto nagusia itxita egongo da baina Galdakaoko Udalak eskaintzen duen programazio kulturalak ez du etenik izango. Zinema saioak Maximo Moreno Musika Eskolako aretoan izango dira asteburuetan eta gainontzeko ikuskizunak Torrezabaleko erakusketa gelan izango dira, Schlegelk azaldu duenez.
«Programazio berezia, anitza eskainiko dugu Aste Santura arte eta ordutik aurrera kalean eskainiko dira saioak», adierazi dute Udaleko ordezkariek, udaren bueltan Torrezabal Kultur Etxearen 30. urteurrena ospatzeko egitarau berezia antolatuko dela nabarmenduz.
