Turkiara bidaiatzeko boluntarioak bilatzen ari da GBGE
TESTUA: Irati Alonso García
ARGAZKIA: GBGE
Galdakaoko Boluntarioen Gizarte Elkartea Turkiara bidaiatzeko boluntarioak bilatzen ari da, Hatay lurraldean sortuko duen laguntza-gunea aurrera eramateko. Albiste honetan batu ditugu boluntariotzaren xehetasunak.
Turkiako hainbat lurraldetako egoera aztertu ondoren, Galdakaoko Boluntarioen Gizarte Elkartea akordio batera heldu da SAR tokiko elkartearekin, Hatay lurraldean kaltetuentzako laguntza-gune bat sortzeko.
Elkarteak azaldu duenez, kaltetuen oinarrizko eskubideak bermatzen saiatuko dira eta horretarako ura, higienea, segurtasuna, osasuna, elikadura, arropa, hezkuntza eta entretenimendua eskainiko dituzte.
Gune hau aurrera eramateko boluntarioen laguntza behar dute eta horregatik GBGE Turkiara bidaiatu nahi duten pertsonak biltatzen ari da. Boluntarioek sei hilabete emango dituzte Hatayn eta Turkey Disaster and Management Authority taldeak utzitako kanpin-dendatan lo egingo dute.
Parte-hartzekotan, hauek dira GBGEk eskainten dituen zerbitzuak:
• Barne-garraioa (herrialde barruko mugimenduak jardueraren helburuak lortzeko)
• Ostatua
• Uniforme osoa
• Jarduera egiteko beharrezko prestakuntza eta materialak
• Laguntza humanitarioko misioan parte hartu izanaren ziurtagiri ofiziala
• Babes-materialak, egoerak hala eskatzen duenean (eskularruak, kaskoak, biserak, txalekoak…)
• Janaria
Turkiara bidaiatzeko hegazkin-txartelak ordea, boluntarioek ordaindu beharko dituzte.
Bidatu nahi izatekotan Ainhoa Cresporekin hitz egin behar da, 674041438 telefonora deituz. GBGEko arduradunak informazio zabalagoa emango die interesa dutenei eta Turkiara bidaiatzeko beharreko dokumentazioa zehaztuko die.
Bestalde, elkarteak gogorarazi du laguntza ekonomikoa eman daitekela ES93 2100 3910 1002 0011 0920 kontuan edo 05028 bizum zenbakian.
