Autu-mautuan
Antton Irusta Zamalloa
BINKE / 2022ko otsaila

Txinatik dator tearen kondaira

Gustuko duzu tea, Binkekide? Txinako kondaira duzu ondorengoa. 

Antzina, Hodei Zuri printzesa bizi zen Txinan. Luzaro egoten zen Hodei Zuri enperadorearen lorategian paseatzen, eta gogoko zuen loto-loreen eta te-zuhaixken artean ibiltzea. Udako egun batean, Hodei Zuri lorategi ederrean zihoala, konturatu gabe, haizemailea putzura erori eta ur-azalean gelditu zitzaion. 

Haizemailea hartzeko makurtu zenean, bere irudia ikusi zuen, putzuko ur garbietan, islaturik. Eta bere islaren alboan, bizar zuridun agure baten irudia ere ikusi zuen.

— Putzuko jeinua naiz—, esan zion agureak.

Hodei Zuri, guztiz lotsaturik eta izuturik, korrika urrundu zen putzutik, haizemailea han utzita. Harrezkero, gaixotu eta, egunetik egunera, gero eta ahulago egoten zen printzesa.

Gau sargori batean, leihoko errezelak mugitzen ari zirela konturatu zen neskatila gaixoa, eta berak hain maite zuen te-zuhaixkaren hosto batzuk sartu ziren leihotik, haizeak bultzatuta. Urez erdi beteta zegoen ontzi batean erori ziren hostoak.

Biharamunean, sukarrarengatik ezpainak handiturik eta lehorturik zituela, ontzitik ur apur bat edan nahi izan zuen. Bat-batean, Putzuko jeinua agertu eta ur hartatik lasai edateko agindu zion. Urak neskatoaren ezpainak ukitu orduko, sukarrak alde egin zion, eta sendatzen hasi zen.

— Hodei Zuri ederra—, esan zion jeinuak— Erakutsi enperadoreari landare honen indar miragarria.

Goiz hartan, Hodei Zuri inoiz baino osasuntsuago eta bikainago altxatu zen ohetik eta, jeinuak eskatu bezala, enperadoreari eta Txina osoari erakutsi zien te miragarri haren dohaina.