Uraren kontsumoa aztertzeko sistema frogatu dute Galdakaon

TESTUA: Irati Alonso García
ARGAZKIA: Galdakaoko Udala

Udalerriek ureztatze-sistemetan, kaleen garbiketan eta iturrietan egiten duten uraren kontsumoa monitorizatuko du Bilbao Bizkaia Ur Partzuergoak. Honen aurretik kontsumoa aztertuko du kontadoreen bitartez eta hiru herritan froga egin du honezkero, tartean Galdakaon. Albiste honetan batu ditugu bildutako datuak eta proiektuaren nondik norakoak.

Bilbao Bizkaia Ur Partzuergoak udalerriek ureztaketetan, baldeen bitartez egindako kaleen garbiketan eta iturrietan egiten duten uraren kontsumoa monitorizatuko ditu. Kontsumo horiek, gaur egun, Bizkaian kontsumitzen den uraren %10 inguru dira eta horregatik, tanta bakoitzak «garrantzia handia» duela azpimarratu du Juan Luis Mozosek, patzuergoko Udal-Sareen zuzendariordeak.

Monitorizazioa Bizkaiko 88 udalerritan egitea aurreikusi dute, «lurraldeak dituen ur-baliabideak ahalik eta modu eraginkorrenean erabiltzen direla bermatzeko helburuz».

Horretarako ordea «ezinbestekoa» da lehenbizi zenbat kontsumitzen den jakitea. Azterketa hau kontadoreen bitartez egingo da eta honezkero hiru herritan froga egin dute: Santurtzi, Sopela eta Galdakao.

Galdakaon batutako datuen arabera, kontadorerik gabeko 39 iturri eta 13 ureztatze-aho daude. Halaber, Ardanza parkeak eta Buho zelaiak ez dute kontsumoa zenbatzeko sistemarik.

Hurrengo pausoa laku hauetan kontadoreak ezartzea izango da eta irailean hasiko dituzte lanak. Galdakaoren kasuan, aurrekontua 76.972 eurokoa izango da.

Ur Partzuergoaren asmoa da gainerako udalerrien azterketa 2024. urtearen hasieran abiatzea eta bi urteko epea izango du gutxienez.