Usansoloko udaletxerako funtzionarioen lan-poltsa irekiko da urtarrilaren 9an
TESTUA: Erredakzioa
ARGAZKIA: Google Maps
Asko hitz egiten da herrian honen inguruan, eta dagoeneko zalantza guztiak argitu dituzte Bizkaiko Foru Aldunditik: Usansoloren udal funtzioak beteko dituen Kudeaketa Batzordea urtarrilaren 9an jarriko da martxan, eta horrekin batera udaletxeko funtzionario izateko lan-poltsa irekiko da. Hemen batu ditugu eskatuko diren profilak eta bete beharreko baldintzak.
Bizkaiko Aldizkari Ofizialak (BAO) Usansolo Galdakaotik bereizteko akordioa argitaratu zuen abenduaren 16an Batzar Nagusiak joan den azaroaren 23an hartutako erabakia. 16 eguneko atzerapenarekin, argitalpenak aktibatu egiten du datorren urtarrilean lurraldeko 113. udala osatzeko prozesua.
Dagoeneko eman dute horren berri, Monika Menak Binkeren bidez bideoz azaldu zuen bezala: Bizkaiko Foru Aldundia arduratuko da eratze-osoko bilkuraren data finkatzeaz, eta urtarrilaren 9rako deitu du egun historiko hori.
Eratze-osoko bilkura horretan —aurretik Kudeaketa Batzordea deitu izan zaion horretan— aukeratuko dira Usansoloko lehen alkatea eta bera buru izango duen kudeaketa-batzordeko beste hamar kideak, Usansoloko hauteskundeak 2023ko maiatzean egin arte —gainontzeko udal-hauteskundeekin batera—. Batzorde hau 2019ko azken hauteskundeetan Usansolon boto gehien lortu zituzten hiru alderdietako ordezkariek osatuko dute, emaitza horien arabera: Usansolo Herria plataformari egokituko zaio zortzi kide izendatzea, tartean presidentea, EAJri bi eta EH Bilduri bakarra.
Bada, BAOren argitalpenak aldez aurretik banaketarako adostutako protokolo osoa berresten du: udalerri berriaren izen ofiziala, mugak eta Usansoloko Udalaren menpe dauden ondasun higiezinak eta finkak. Era berean, zehaztu da 25 funtzionariorekin hasiko dela Usansoloko Udala, eta Galdakaok hamabi hilabeteko epea duela diruzaintzaren %15 transferitzeko —6,5 milioi inguru—, «biztanleria-ratioa» oinarri hartuta. Hau da, 2021eko datuen arabera, Usansolok 4.520 biztanle ditu, eta biztanleria horretan erroldatutakoen %15,3 dira.
Beraz, urtarrilaren 9an irekiko da Unkina plazan kokatuko den Usansoloko udaletxean lan egiteko funtzionarioen deialdia. Horren inguruko xehetasun gehiago eskatu ditu Binkek Bizkaiko Foru Aldundian, eta honek adierazi «mota guztietako profilak» eskatuko direla Usansoloko Udalean lan egiteko: «atezainak, administrariak, udaltzainak, idazkariak, arkitektoak, ingeniariak,…».
Hori bai, Usansolo Herriatik argi utzi dute Usansoloko udaletxean lan egiteko hautagai guztiek euskara ez ezik arratiera ere menperatu beharko dutela, «Arratiako kapitala izateko bidean horrek aukera asko emongo deuskuzalako».
