Aingeru Garay eskiatzaile galdakoztarrak Munduko Eski Alpino Kopan parte hartuko du
TESTUA: Irati Alonso García
ARGAZKIA: Aingeru Garayren sareetatik
Eski alpino modalitateko Munduko Kopa lehiatuko da gaur Alemaniako Garmisch-Partenkirchen pistan eta parte-hartzaileen artean izango da Aingeru Garay galdakoztarra slalom kategorian. Gaztea lehen aldiz izango da maila honetako lehiaketa batean.
Gaztea da oraindik baina emaitza onak lortu ditu orain arte Aingeru Garay (1998, Galdakao) eskiatzaileak, Binkeren 2021eko ekaineko portada izandakoak. Kirolariak hogeigarren postua lortu zuen abenduaren 15ean Italian ospatu zen Europako Kopan. 2021-22 denboraldian aldiz, hamaseigarrena izan zen Frantzian lehiatutako slalom Europako Kopan.
Emaitza guzti hauei esker, eski alpino modalitateko Munduko Kopan parte hartzeko aukera izango du lehen aldiz gaur, urtarrilak 4, slalom modalitatean. Alemaniako Garmisch-Partenkirchen pistan lehiatuko da eta berarekin batera izango da Juan del Campo, Garay bezala Basque Teameko bekaduna dena.
Arratsaldeko 15:40etatik aurrera parte hartuko dute biek lehen fasean eta bigarren txandara sailkatzea bilatuko dute honetan.
Garay berak adierazi duenez, «hau beste urrats bat baino ez da. Lanean jarraituko dut geratzen diren amets guztiak betetzeko». Izan ere, Binkeri 2021eko ekainean egindako elkarrizketan aitortutako moduan, «eskia probatzen lehenengoz urtetxo batekin utzi zidaten Baqueirako haurtzaindegian, eta geroztik ez diot eskiatzeari utzi».
