Galdakantari ekimenak bihar egingo du urteko bigarren kantaldia

TESTUA: Irati Alonso García
ARGAZKIA: Galdakantari ekimenaren sareetatik

Bi hilabete barru zazpi urte beteko ditu Galdakaoko kaleetan zehar abesten duen Galdakantari ekimenak. Hilabeteko hirugarren barikuetan batzen dira eta bihar egingo dute urteko bigarren kantaldia.

Ilusioz beterik hasi ziren Galdakantari ekimeneko kideak kaleetan zehar abesten 2016ko apirilean. Ordutik, hilabeteko hirugarren barikuetan irtetzen dira eta guztira hirurogeita hamar kantaldi inguru egin zituzte. Pandemian ere, zuzeneko emanaldiak eta bideoak eskaini zituzten.

Urtarrileko hirugarren barikuan izan ziren herriko txokoetan zehar auzokideekin batera, eta bihar egingo dute urteko bigarren kantaldia. Arratsaldeko 20:00etan Mugurun izango dira eta 21:00etatik aurrera Santi Brouard enparantzan. ‘Loretxoa’, ‘Zenbat gera’, ‘Xalbadorren heriotzean’ eta ‘Txoriak txori’ bezalako klasikoak abestuko dituzte.

Galdakao ez ezik, kantari gehienak inguruko beste talde batzutan ere parte hartzen dute, besteak beste:
Bilbo Kantari, SanMigel Kantari, Basauri kantari, Plentziako Kantagunea eta Getxo Kantuz. Horrela, zazpi herrialdeetan dagoen mugimendu oso batekin kontaktua mantentzen dute.

Kantaldiei buruzko informazio gehiago eta taldearen emanaldiak ezagutu daitezke haien Facebook kontuan.