Universitario Bilbao Rugby taldea
BINKE / 2019ko otsaila

«Sei galdakoztar daukaguz momentu honetan gure taldean»

TESTUA: Ixone Muñiz Arana
ARGAZKIA: Iñigo de Miguel

Universitario Bilbao Rugby taldea, izen honekin, 2000. urtetik ezagutzen dugu, zenbait aldaketaren ostean, Bilbao Rugby Club eta Universitario XV klubak batu zirenetik. Baina, berez, taldeak 50 urteko ibilbidea ospatzen du aurten. Egun, hainbat kategoriatan banatutako 400 bat jokalari ditu UBRk.

Zeintzuk dira klub honek defendatzen eta sustatzen dituen baloreak? Monje irlandar batek esaten eban umeek errugbira jokatu beharko leukiela esfortzua eta talde-lanak eragiten dauan sufrimentua zer diran jakiteko. Harek esaten ebanez, errugbian batzuetan jokua zaildu egiten da, baina ez dira inoiz plantak egiten, eta asmoa ez da inoiz arbitroari iruzur egitea. Errugbian irabazleak pasiloa egiten dautso galdu dauenari egindako esfortzua eskertuz eta, gainera, etxeko taldea derrigortuta dago bisitariari bazkaltzera gondidatzera. Beraz, hezkuntza, esfortzua, errespetua, isiltasuna, lana, dedikazioa, eta batez be, umiltasuna dira errugbiaren baloreak, eta gurean be hauek dira lantzen doguzanak. 

Bilboko jokalariez gain, galdakoztarrak ere badituzue! Bai, Bilboko eta inguruko herriko jokalariak dagoz klubean. Galdakaotik sei gazte daukaguz momentu honetan taldean: Eneko, Xabier eta Aritza Arzalluz anaiak, Ibai Saratxaga, Oiher Agirre eta Finlay Isasi. Galdakoztarrak eta ingurukoak gurera hurbildu eta erreugbia probatzera gonbidatzen doguz, noski!

Nesken artean geroz eta arrakasta gehiago du errugbiak? UBR kluba gizartearen isla da eta, beraz, neskek be mutilen moduan euren tokia daukie. 90ko hamarkadan Universitario XV klubak nesken taldea atara eban, eta urte batzuk talde barik egon eta gero, orain dala hiru denboraldi berrogei bat neskek osatzen daben emakumeen senior taldea sortu zan. Bestalde, talde txikietatik, hau da, sei urte azpiko taldetik hasita eta 16 urte azpiko taldera arte, neskek eta mutilek alkarregaz jokatzen dabe, talde mistoak osatuz. 

Inklusibitate eta aniztasunari arreta berezia eskaintzen diezue, ez al da? Bai, esan dogun moduan, kluba gizartearen isla danez, herritar guztiontzako dago tokia eta, beraz, dibertsitate funtzionala daukien pertsonentzako be. Orain hiru denboraldi jarri zala talde hau martxan.

Beteranoek ere badute euren tokia taldean? Bai, adinak be ez dauka mugarik UBR taldean, sei urte azpiko jokalarietatik ia 55 urteko jokalariak be daukaguz eta! 35 urtetik gorakoek lekua daukie beteranoen taldean. Astero entrenatzen dabe, eta hilean edo bi hilerik behin partidu bat jokatzen dabe. Horretaz aparte, beteranoek orain dala 30 urte martxan jarri eben «German Cando» txapelketa jokatzen dabe, auto istripu baten ondorioz gurpildun aulkian dagoan German jokalari ohiaren omenez. Talde batean zein bestean izan, errugbian jokatu gura dabenek, idatzi dagiela hona: bilbaorugby.eus