Kantu Kolore taldeak ‘Esna zaitez’ ikuskizuna eskainiko du domekan Torrezabalen

TESTUA: Irati Alonso García
ARGAZKIA: Kantu Kolore

Torrezabal Kultur Etxeak ‘Esna zaitez’ ikuskizuna hartuko du domekan, Kantu Kolore taldearen eskutik. Emanaldia umeei zuzenduta dago eta musika, dantza eta umorea uztartzen ditu.

Galdakaoko Udalak egitarau zabala antolatu du Torrezabal Kultur Etxean abendura bitarte, antzezlanak, kontzertuak eta ikuskizunak eskainiko direla, Binkek jaso zuen moduan. Domekan Kantu Kolore talde helduko da Galdakaora, ‘Esna zaitez’ ikuskizunarekin.

Antzezlan musikal hau 2 eta 12 urte arteko umeei zuzenduta dago eta dantza eta umorea ere uztartzen ditu Mikel Leibarren zuzendaritzapean.

Kantu koloreko protagonistak «berebiziko» abentura berri batean murgilduko dira Galdakaon eta denok batera Mundu hobea eraikitzen erakutsiko diote publikoari. Bi saio eskainiko ditu, 16:30 eta 18:30ean eta sarrerak salgai daude Torrezabalen eta webgunean.

«Gure planeta, gehien bat plastikoz, kutsatzen ari da. Honen inguruan sentsibilizazioa sortuko dugu, denon artean gurea den lur planeta salbatzeko, bertaratzen direnekin hartu-emana sortuz. Argiz eta dantzaz betetako musikal alai eta dibertigarria eskeiniko dugu, familian gozatzeaz gain, jasangarritasunaren alde egingo duena», azaldu dute Kantu Koloretik.