Ane Atxutegi usansolotarra, Bizkaiko orga joko txapelketako txapeldun berria
TESTUA ETA ARGAZKIA: Jon Gomez Garai
Bilbao Basque Fest jaialdian, herri kirolen gunean antolatutako Bizkaiko orga joko txapelketan, Ane Atxutegi usansolotarra izan zen txapeldun Nerea Sanz iazko txapeldunari lekua kenduta. Ehunka ikusleren aurrean, eta 140 kiloko orgarekin lanean, Bilboko Areatzan jantzi zuen txapela Atxutegik eguenean.
Aste Santuko jai egunetan euskal kulturaz bete ohi dira, orain 10 urtetik, Bilboko kaleak Bilbao Basque Fest jaialdiaren bitartez. Guztira ia 200 ekintza eta ikuskizun eskaintzen ditu jaialdiak Bilboko 30 gunetan banatuta, eta horietako bat herri kirolei eskainitako Areatzako gunea dago. Eguen honetako eguerdian, martxoak 28, orga jokoaren modalitateak izan zuen leku nabarmena bere Bizkaiko txapelketa ofizialarekin.
Bertan aritu zen Ane Atxutegi usansolotarra, eta bera izan zen Bizkaiko txapeldun berria. Bere lehenengo orga joko txapelketan lortu zuen txapela, eta Nerea Sanz algortarrari iazko postua kenduta. Iazko txapeldunak hiru buelta, laurden bat eta 2,70 metro egin zituen 140 kiloko orga gainean eramanda.
Atxutegik berriz, hiru buelta, hiru laurden eta bost zentimetroko ariketa gaindituta lortu zuen Bizkaiko txapelketako aurtengo onena izatea. Berarekin eta Sanz txapeldunordearekin batera aritu ziren orga jokoaren txapelketan Lucía Perez toledoarra —hirugarren— eta Ainize Perez bedaruarra —laugarren—.
Bizkaiko orga jokoko txapeldun berriari saria eta txapela Bizkaiko Foru Aldundiko kirol zuzendari nagusi Carlos Sergiok eta Bilboko Udaleko zinegotzi Xabier Otxandianok jantzi zioten —argazkian eskuin eta ezker, hurrenez hurren—.
Sustabiz herri kirol zentroan
Ane Atxutegi usansolotar kirolaria —bere neba Jon eta Mikelekin batera BINKEren 2018ko otsaileko azaleko protagonista izan zena— Gernika-Lumoko Sustabiz Herri Kirol Zentroan dabil. Izen bereko Sustabiz fundazioaren barne dagoen zentroa da, eta fundazio honek herri kirolak, arrauna eta euskal pilota sustatzea eta eraberritzea ditu helburu.
Bada, Atxutegi harrijasotzean hasi zen zentro honetan federatu —Bizkaiko harrijasotze txapelketa ofizialean ere aritu da dagoeneko—, baina ikusita Bilbao Basque Fest jaialdi jendetsuan Bizkaiko orga joko txapelketa ofiziala antolatu behar zela, «Atxutegi proba hauek prestatzen hasi zan», azaldu dio BINKEri Joseba Etxebarria Bizkaiko herri kirolen federazioko zuzendariak. Hasi, eta irabazi.
Gainera, Bilboko Areatzan ehunka lagunen aurrean jokatutako Bizkaiko orga joko txapelketa hau irabaztea «are bereziagoa» izan dela aitortu zion Etxebarriak hedabide honi, kontuan hartuta egoitza Gernikan duen zentro honek 2023ko maiatzean ireki zituela bere ateak: «Ane Atxutegik irabazi dauana Sustabiz Herri Kirol Zentroak antolatutako lehenengo txapelketa ofiziala izan da».
