Bi usansolotarrek 900 kilometro egin dituzte bizikletaz Athleticen finala Sevillan ikusteko
TESTUA: Irati Alonso García
ARGAZKIAK: Ricardo Capetillok bidalitakoak
Athletic Clubek Espainiako Erregearen Kopako finala jokatuko du zapatuan Sevillan eta Josu Gonzalez eta Ricardo Capetillo usansolotarrak han izango dira. Bertara iristeko ibilbidea modu bitxi batean egin du bikoteak: 900 kilometroak bizikletaz egin dituzte. Capetillorekin hitz egin du BINKEk esperientziaren inguruan.
Milaka zale zurigorri Sevillan dira honezkero, Athletic Clubek zapatuan RCD Mallorcaren aurka jokatuko duen finalaren zain. Autobusez, kotxez, trenez edo hegakinez, hainbat modu ezberdinez joan dira Bizkaitik eta mundu osotik Andaluziako hirira.
Usansolotik ordea, modu bitxia aukeratu dute bi auzokidek: bizikleta. Josu Gonzalezek eta Ricardo Capetillok 900 kilometro egin dituzte Usansolotik Sevillara Athleticen finala ikusteko. «Gogorra izan da zati batzuetan baina orokorrean polita, oso polita izan da bidaia», aitortu dio Capetillok BINKEri Sevillatik.
Finalaurrekoetan hartu zuten bidaia bizikletaz egiteko erabakia. «Athletic finalerako sailkatu zenean Sevillara bizikletaz joateko gogoa nuela komentatu nuen eta Josu animatu zen. Lagun batekin egin ahal izatea ikaragarria iruditu zitzaidan!», azaldu du usansolotarrak.
Martxoaren 24an irten ziren Usansolotik eta guztira bederatzi etapa egin dituzte Sevillara heldu arte. Eguraldi ona izan dute bidelagun momentu askotan, baina baita haize boladak ere: «Zati batzuetan gelditu behar izan ginen. Beldurra genuen eta egokiena gelditzea zen».
Une gogorrak izan ziren hurak baina onak izan dira gehienak duela urte asko elkar ezagutzen duen lagun bikotearentzat. «Onena bidean izan dugun harrera izan da. Jendeak asko lagundu gaitu eta Athleticen zaleak izanda asko errespetatu gaituzte», azpimarratu du usansolotarrak.
Gonzalez etxera bueltatu behar izan da bere emazteari tabernan laguntzeko baina Capetillo Sevillan dago oraindik, partida bizitzeko irrikitan. Emaitzaren inguruan galdetuta, 1-0 aurreikusten du Athleticen alde.
Irabazi edo galdu, usansolotarrak buelta nola izango den argi du: «Bizikletaz ez! Etxean dago honezkero, jajaja!».
