Galdakao Bolei Taldeko mutilak Superliga 2 mailara igo dira

TESTUA: Irati Alonso García
ARGAZKIA: Galdakao Bolei Taldea

Galdakao Bolei Taldeko senior mutilak Superliga 2 mailara igotzea lortu dute, zapatuan 2-3 Madrilgo Chamartin taldearen kontra irabazi ostean. Partida Ardanza parkeko pantaila erraldoian ikusi ahal izan zen, Athleticen finalaren aurretik.

Egun historikoa bizi zuen Bizkaiak zapatuan, Athletic Clubek Espainiako Erregearen Kopa lortuz 40 urteren ostean. Zurigorriek penaltietan irabazi zuten partida RCD Mallorcaren aurka, milaka zaleren poztasuna piztuz.

Galdakaorentzat ere egun berezia izan zen, ez bakarrik Athleticen garaipenagatik, Galdakao Bolei Taldeak eskuratutako lorpen historikoagatik ere. Talde galdakoztarraren senior gizonezkoek 2-3 irabazi zuten Madrilgo Chamartinen kontra eta honekin automatikoki sailkatu dira hurrengo denboraldian Superliga 2 mailan jolasteko.

Galdakao Bolei Taldetik adierazi dutenez, partida sufrimendurik beterikoa izan zen eta ez zen azken set-era arte erabaki, 21-23 emaitzarekin. «Markagailuko txandatze asko egon ziren», nabarmendu dute klubetik, mutilek denboraldi osoan zehar egindako lana aldarrikatuz: «Zorionak gure mutilei, gozatu, merezimenduz ospatu, datorren urtean Superligan gaude!».

Partida Galdakaoko Udalak Ardanza parkean kokatutako pantaila erraldoian ikusi ahal izan zen, Athleticen partidaren aurretik.