Torrezabal Kultur Etxeko areto nagusia domekan irekiko dute berriz
TESTUA: Irati Alonso García
ARGAZKIA: BINKE
Torrezabal Kultur Etxeko areto nagusia hobetzeko asmoz, obrak egin dituzte lau hilabetetan zehar eta honezkero bukatu dituzte. Domekan, maiatzak 12, irekiko dute berriz eta Galdakaoko Da Capo Banda arituko da aretoan, Leyre Sanz abeslari eta Maximo Moreno Musika Eskolako irakaslearekin batera.
Urtarrilean hasi ziren Torrezabal Kultur Etxeko areto nagusia eraberritzeko obrak. Hauen bitartez, areto «erosoagoa eta isolamendu akustiko hobeagoa duena» egin dute eta horretarako lau hilabeteetan zehar ibili dira lanean.
Obrak amaitu dituzte honezkero eta domekan, maiatzak 12, irekiko dute areto nagusi berria. Hau Galdakaoko Da Capo Bandak estreninatuko du egun horretan 13:00etan, Leyre Sanz abeslari eta Maximo Moreno Musika Eskolako irakaslearekin batera.
Errepertorio zabala eskainiko dute, bertoko artisten lanak, Xabier Lete, Itoiz edo Mikel Laboa, zein nazioartekoenak interpretatuz, Frank Sinatra edo Ella Fitzgerald.
Zinemak ere protagonismo berezia izango du irekiera honetan, izan ere, film klasiko proiektatuko dira. Batetik, Charles Chaplinen ‘The Circus’ ikusteko aukera izango da domekan ere, kasu honetan 19:00etan. Astelehenean aldiz, 20:00etan, ‘Cinema Paradiso’ proiektatuko da, gaztelaniara bikoiztutako bertsioa.
Hiru jarduerak doakoak dira, baina beharrezkoa izango da gonbidapena izatea. Maiatzaren 9tik aurrera gonbidapenak ohiko lekuetan egongo dira eskuragarri: webgunean, Torrezabaleko totemean eta leihatilan, saioa hasi baino ordubete lehenago.
Bestalde, Galdakaoko Udalak iragarri duenez, Torrezabalen 30. urteurrena ospatzeko jaia antolatuko dute udazkenean.
