Etxez etxeko arretarako maleta digitala jarri da martxan Barrualde-Galdakaoko ESIan
TESTUA: Irati Alonso García
ARGAZKIA: Osakidetza
Euskal herritarren etxeetan eskaintzen den Lehen Mailako Arreta hobetzeko asmoz, maleta digitala jarri du martxan Osakidetzak. Teknologia aitzindaria izango du eta momentuz Uribeko ESIan eta Barrualde-Galdakaoko ESIan ezarri dute soilik.
Osakidetzak ‘Maletik’ trensa jarri du martxan, etxez etxeko Lehen Mailako Arreta hobetuko duen maleta digitala. Tresna honekin etxeko kontsultetan egiten diren ohiko proba guztiak digitalizatuko dira, hala nola elektrokardiograma bat egiten denean, tentsioa hartzen denean edo fonendo bidezko auskultazioa egiten denean.
Eusko Jaurlaritzako Osasuneko sailburu Gotzone Sagarduik adierazi duenez, «tresna honek oso harrera positiboa izan du profesionalen eta pazienteen aldetik, eta Osakidetzak sendoa, kalitatezkoa, gertukoa eta berritzailea den Lehen Mailako Arreta baten alde egiten duen apustuaren adierazgarri da». Pilotajea Uribeko ESIan eta Barrualde-Galdakao ESIan egin da, otsailetik apirilera bitartean, eta aurreikusita dago hilabete honetan zabaltzea Osakidetzaren sare osoan.
Teknologia hau aitzindaria da Espainiar estatuan, eta etxez etxeko arreta ematen duten mediku eta erizain taldeei hornitzen hasi zaie, haien lana errazteko eta kalitate handiagoko asistentzia emateko.
Maleta digitalari esker, pazienteen etxeetan egiten diren proba guztiak zuzenean erregistratu daitezke historia klinikoan, eta ez da beharrezkoa ondoren emaitzak sartzea, osasun-zentroetako profesionalekin kontsulta bat egin daiteke unean bertan, edo, behar izanez gero, espezialistarengana deribatu ahal da. Gainera, prozesuak segurtasuna handitzen du, konstanteak berriz idatzi behar izatea eta akatsak egitea saihesten baititu.
‘Maletik’ sistemak tresna digital hauek ditu: elektrokardiograma, espirometroa, dermatoskopioa, otoskopioa, tentsiometroa, pulsioximetroa, fonendoa, termometroa, tableta eta kanpoko bateria bat. Tresna horiei esker, konstanteen erregistroak, irudiak eta auskultazioen audioak hartu eta pazientearen historian kargatu ahal dira. Osakidetzak mota horretako 170 unitate eskuratu ditu guztira.
