Galdakaoko emakumezkoen lehen futbol taldea omenduko dute Santakurtzetan
TESTUA: Irati Alonso García
ARGAZKIA: BINKEri bidalitakoa
Gorantza Futbol Taldea 1967ko Santakurtzetan jaio zen eta emakumez osatutako lehen talde galdakoztarra izan zen. Astelehenean, irailak 16, omenaldia jasoko dute talde honetako kideek Santa Barbara futbol zelaian.
Urtero moduan, 1967ko irailean Santakurtzak ospatu ziren eta hauen egitarauaren baitan emakumezkoen futbol partida bat antolatzea erabaki zuen Galdakaoko Udalak. Elorrioko neskak etorri ziren herrira eta neska gazte galdakoztarrentzat «oso partida berezia» izan zen, BINKEri aitortu moduan.
Horren ostean, jokatzen jarraitzea erabaki zuten neskek eta horrela sortu zen Gorantza Futbol Taldea, emakumez osatutako lehen talde galdakoztarra.
Gizonen mundu batean, bide bat zabaldu zuen emakume talde honek eta honen garrantzia azpimarratzeko helburuz, Galdakaoko Udalak eta Galdakao Futbol Klubak omenaldia egingo diete emakume aitzindari horiei.
Honakoak izango dira omenduak: Eguzkiñe Loroño, Pili Moreno, Blanqui Goiri, Emili Suarez, Amaia Garay, Eguzkiñe Garay, Rosario Etxabe, Maribel Saratxaga, Marieli Aurtenetxe, Maria Angeles Yarritu, Henar Yarritu, Maria Jesus Urgoiti, Belen Urgoiti, Virginia Gonzalez Ramos, Mari Carmen Alvarez eta Maria Pilar Torres jokalariak, Miguel Caballero entrenatzailea, eta Koldo Tutor eta Arturo Maza laguntzaileak.
Ekitaldia astelehenean, irailak 16, izango da 17:30ean Santa Barbara futbol zelaian eta ondoren, partida jokatuko dute Galdakao futbol taldeko jokalari ohiek eta Athletic Clubak.
