Umeentzako ‘Sotobosque’ ikuskizuna eskainiko du Inspira Teatre konpainiak Torrezabalen

TESTUA: Irati Alonso García
ARGAZKIA: Santander Creativa

Torrezabal Kultur Etxeak ‘Sotobosque. La vida bajo los árboles’ ikuskizuna hartuko du domekan, martxoak 2. Inspira Teatre konpainiak eskainiko du eta obra «musikatua, bisuala eta mugimenduduna» da.

Torrezabal Kultur Etxeak ekainera bitarte eskainiko duen egitarau zabalarekin jarraitzen du eta honen baitan asteburu honetan bi saio hartuko ditu. Bihar, martxoak 1, Teatro Gorakadak ‘Moko’ umeari buruzko antzezlana aurkeztuko du, BINKEk jaso zuen moduan.

Domekan aldiz, Inspira Teatre konpainia helduko da Galdakaoko aretora, kasu honetan haurrei ere zuzendutako ikuskizun batekin. Taldeak ‘Sotobosque. La vida bajo los árboles’ lana aurkeztuko du, obra «musikatua, bisuala eta mugimenduduna».

Ikuskizun honek lehen haurtzaroarentzako ikuskizun onenaren saria jaso du FETEN 2023 eta Mostra d’Igualada azoketan eta Galdakaon bi aukera izango dira ikusteko: 12:00etan eta 17:00etan. Saio bietarako sarrerak eskuragai daude ohiko webgunean 4 eta 6 euro arteko prezioan.