Galdakaoko Udalak erretiroa hartu berri duten langileei aitortza egin die
TESTUA: Irati Alonso García
ARGAZKIA: Galdakaoko Udalak
Ohitura bihurtu denari jarraituz, Galdakaoko Udalak omenaldia egin die erretiroa hartu berri duten langileei. Guztira 16 izan ziren udaletxeko pleno aretoan ospatu zen hitzordura joan ziren pertsonak.
Galdakaoko Udalak erretiroa hartzen duten langileak omentzeko ohitura du eta hori egiten jarraitzen du. Oraingoan 16 langile omendu ditu, Galdakaoko udaletxeko pleno aretoan egindako ekitaldi batean.
Ekitaldian, Edurne Espilla jarduneko alkateak, Asier Egiraun Hirigintza, Obra eta Zerbitzuak, eta Segurtasun zinegotziak eta Eguzkiñe Gezuraga Giza Baliabideetako zinegotziak langile ohiei eskerrak eman zizkieten «haien eguneroko lanean erakutsitako konpromisoagatik, komunitatearen garapenean eta ongizatean laguntzeko egin duten lanagatik».
«Oso egun polita da hau, urte askotan, batzuek ia 50 urtez, egindako lana gogoratzeko unea delako», adierazi zuen Espillak. Egiraunek, azken sei urteak langile horiekin konpartitu izanaz eta elkarrekin egindako lanaz «oso harro» dagoela adierazi zuen.
Azkenik, «urteko ekitaldirik politena da hau», aitortu du Gezuragak. Omenduek egindako lana eskertu zuen, «bai kanpoan ikusten dena baina baita barruan egiten dena ere, ezinbestekoa baita. Lan guzti hori barik, herritarren bizitza askoz okerragoa izango litzateke».
