Galdakaoko lehen orientazio zirkuitu iraunkorra sortu dute Aperribai inguruan
TESTUA: Irati Alonso García
ARGAZKIA: Galdakaoko Udala
Ganguren Mendi Taldeak Galdakaoko lehen orientazio zirkuitu iraunkorra aurkeztu du. Aperribai inguruan dago eta hiru ibilbide ditu, mailaka berezita.
Galdakaoko lehen orientazio zirkuitu iraunkorra jarri du martxan Ganguren Mendi Taldeak Aperribai inguruan. Hainbat eragileren arteko elkarlenaren emaitza da egitasmoa, atzo egindako aurkezpenean azaldu zutenez. Bertan batu ziren Asier Korta Galdakaoko Kirol zinegotzia, Eduardo Olea Ganguren MTko presidentea, Joseba Bolaños Bizkaiko Orientazio Klubeko presidentea, Alberto Boveda Bizkaiko Orientazio Klubeko kidea eta mapak egiteko arduraduna, Ainara Ibarra Orbelako ordezkaria, eta Xabier Valencia historialaria.
Kirola eginez udalerriko ondarea, historia eta kultura balioan jartzen dituen logika eta estrategia jokoa da zirkuitua, Bizkaiko bigarrena. Kortak nabarmendu zuenez, «Galdakaoko ondarearen, historiaren eta kulturaren ezagutza» sustatzen ditu. «Bakarka, lagunekin edo familiarekin gozatzeko aisialdi modu berri bat da», adierazi zuen.
Ganguren MTko presidenteak adierazi zuenez, 2019an elkartea udalerrian seinaleztapen lanak egiten hasi zenetik, «200 kilometro inguru seinaleztatu dira udalerrian Udalaren laguntzari esker». Ildo horretan, azaldu zuen iaz sortu zirela «zirkuitu honen ideia eta laguntzaileak bilatzeko lanak».
Horien artean, Xabier Valencia historialari galdakoztarra dago. Bere hitzetan «kultur ondareari, leku historikoei, toponimiak berreskuratzeari eta abarri balioa emateko asmoz». Orbelak ere ekimenean parte hartu du, seinaleak diseinatuz, fabrikatuz eta jarriz, Ainara Ibarra ordezkariak azaldu zuenez. Azkenik, Alberto Boveda COBIko kideak proiektuaren bidez «orientazioa ezagutarazteko aukera» nabarmendu zuen eta zirkuituaren dinamika azaldu zuen.
Galdakaoko orientazio zirkuitu iraunkorrak mailaka bereizitako hiru ibilbide ditu: horia, Jugu-Aperribai, 2,1 kilometrokoa; laranja, Aperribai-Olabarrieta-Txistulanda, 3,5 kilometrokoa; eta gorria, Jugu-Aperribai-Olabarrieta-Txistulanda, 5,5 kilometrokoa.
Plano batean markatutako ibilbidea egin behar da eta horretarako, orientazioa oinarri hartu, eta kontrol puntuak bilatu beharko dira. Kasu honetan, zentzu ludikoari erabilera didaktikoa gehitu zaio, izen, toponimia eta leku ez oso ezagunak eta interes kultural eta historikoren bat dutenak ezagutarazten saiatuz. Kontrol puntuetatik igarotzen dela egiaztatzeko, aplikazio bat erabil daiteke mugikorrean, eta baita balizetan jarri diren QR kodeak ere.
Informazio guztia eta planoak ezagutu daitezke Ganguren Mendi Taldearen webgunean.
