Aterpe Eguna antolatuko du Gangurenek maiatzaren 4an

TESTUA: Irati Alonso García
ARGAZKIA: Ganguren Mendi Taldea

Ganguren Mendi Talde galdakoztarrak Aterpe Eguna antolatuko du maiatzaren 4an. Parte-hartzaileek 10 kilometroko ibilbidea egingo dute Gorbeiaren inguruetatik eta ostean taldeak garaikurrak banatuko dizkie bazkideei.

Ganguren Mendi Taldeak 80 urte bete ditu aurten eta hau ospatzeko egitarau zabala prestatu du urte osorako. Talde galdakoztarrak ibilbideak, irteera kulturalak eta lasterketak eskainiko ditu, besteak beste, Galdakaon eta herritik kanpo.

Maiatzaren 4an esaterako, Aterpe Eguna antolatuko du taldeak Gorbeiaren inguruetan. Parte-hartzaileek 10 kilometroko ibilbidea egingo dute Pagomakurretik abiatuta, eta hauek igaroko dituzte: Arraba, Ipergorta, Egiriñao, Arraba eta berriz aterpea.

Ostean, 13:00 inguruan, taldeak garaikurrak banatuko dizkie bere bazkideei, 2024an egindako lorpenengatik. Paella dastatuko dute ere, ibilaldiko ibiltari guztiei oparituko zaiena. «Ibilbide hau egin nahi ez dutenak zuzenean joan daitezke Arrabara eta12:30ak aldera iritsi aterpera», adierazi dute taldetik.

Informazio gehiago ezagutu daiteke Ganguren Mendi Taldearen webgunean.