Su Ta Gar, Süne, Puro Relajo eta Tanxugueiras taldeak, aurtengo Santakurtzetan

TESTUA: Irati Alonso García
ARGAZKIA: BINKE

Galdakaoko Udalak 2025ko Santakurtzetako musika talde nagusiak iragarri berri ditu, herritarrek parte-hartze prozesu baten bidez aukeratutakoak. Ondoko albistean batu ditugu prozesuaren nondik norakoak eta taldeen kontzertu-datak.

Azken urteetan ohiko izaten ari den bezala, Galdakaoko Santakurtzetako kontzertu nagusiak herritarrek erabakitzen dituzte erabaki.galdakao.eus atariaren bitartez. Eta hala erabaki dute aurten parte hartu duten herritarrek ere Ardanza parkeko kartel nagusia:

• Irailak 12, barikua: Su Ta Gar. 1987an Eibarren (Gipuzkoa) sortutako heavy metal taldea, Euskal Herriko arrakastatsuena. Bere energiaren eta letretan jorratutako gai sozial eta kulturalen bidez oso ezaguna egin zen, eta urteak eman ditu Euskal Herriko musika heavyaren gailurrean. Musika eszenako banda garrantzitsuenetako bat bihurtzen du horrek.
• Irailak 13, zapatua: Süne. Josune Arakistain Salas (Lastur, Gipuzkoa, 1996) euskal kantautorea eta musikaria da, Huntza bandako abeslaria izateagatik ezaguna. Bere estiloagatik eta energia sutsuagatik bereizten da, trikitixaren bidez hainbat genero uztartzen dituelarik.
• Irailak 19, barikua: Puro Relajo. 2013an Aibarren (Nafarroa) sortutako taldea. Bost musikarik osatzen dute (baxua eta ahotsa, gitarra eta ahotsa, akordeoia eta ahotsa eta 2 tronpeta) eta abesti mexikarrak eta klasikoak interpretatzen dituzte euskaraz zein gazteleraz. Lagunen afari baten bazkalondoan piztutako ideia baten ondorioz sortu zen. Euskal Herri osoko herri eta hirietan izugarrizko arrakasta lortu du azken urteotan.
• Irailak 20, zapatua: Tanxugueiras. Musika paradigma desafiatzen eta aldatzen ari den talde galiziarra. Aida Tarriok eta Sabela eta Olaia Maneirok, soinu guztiz ezberdin baina ezagun batekin, Galiziako musika tradizionala gaur egungo estiloetara egokitzen dute. Bere zuzeneko berria AntesD biraren barruan dago, eta orain arte taldean ikusitako izaera dinamiko eta indartsuena du.

Horiekin batera, bertako lau talde izango dira Ardantzako eszenatokian, baina Galdakaoko talde horien izenak aurrerago ezagutuko dira.

Hautaketa prozesuari dagokionez, Galdakaoko Udalaren arabera, lehen fasean 391 proposamen jaso ziren, eta oinarrizko baldintzak betetzen ez zituztenak baztertu ostean, bozketa faseari ekin zitzaion. Su Ta Gar gailendu da lehen barikuko kontzerturako, 210 botorekin; Duplak 103 boto jaso ditu eta Nøgenek 101.

Lehen zapatuko kontzerturako aldiz, Sünek 262 boto lortu ditu, J Martinak 88 eta Merina Grisek 63. Azken larunbaterako kontzerturako, berriz, Tanxugueiras talde galiziarra aukeratu dute herritarrek, 287 botorekin; Ainhoa Cantalapiedra 138 botorekin babestu dute eta Alba Reche 33rekin. Beraz, guztira, herritarrek 1.285 boto eman dituzte.

Jai Batzordeak, bestetik, rantxerak oinarri dituen Puro Relajo talde nafarra aukeratu du, 12 talde eta kuadrilen botorekin. Kaotikok 3 talderen babesa izan du, Zurizek birena eta Janus Lesterrek batena.

Kontzertuak aukeratzeko herritarren parte hartze prozesuari buruzko informazio guztia Udaleko parte-hartze plataforman kontsulta daiteke.