Euskal Herriko 300 pentsiodunetik gora Galdakaon batu ziren eguenean
TESTUA: Jon Gomez Garai
ARGAZKIA: Euskal Herriko Pentsiodunen Elkartea
Astelehenero egiten duten elkarretaratzeari inoiz baino lagun gehiago batu zitzaizkien eguenean Galdakaoko pentsiodunei, Euskal Herriko Erretiratuen eta Pentsiodunen Elkarteak kalejira, bazkari, olerki lehiaketa eta Gontzal Mendibilen kontzertua antolatuta Galdakaon. Ondo albistean batu ditugu olerkien lehiaketako irabazleak eta Euskal Herriko pentsiodunen mugimenduak egindako zenbait adierazpen.
Euskal Herriko pentsiodunen mugimenduak «pentsio publiko eta duinen alde», 300 pertsona baino gehiago bilduta, ia egun osoko eguna antolatu zuten maiatzaren 8an Galdakaon. «Energiaz, konpromisoz eta alaitasunez beteriko giroan», hala baloratu zuten pentsiodunek Galdakaon bizi izan zuten «egun ahaztezina».
Eguna 13:00ean hasi zuten, Santi Brouard plazan, txistulariek alaitutako kalejira batekin. Txistulariek herriko erdigunea zeharkatu zuten, euskal musika tradizionalen doinupean. «Parte-hartze masiboa eta sutsua izan zen, mugimendu pentsiodunaren aldarrikapenekin herriak duen konpromiso sozial sendoa islatuz», adierazi du Euskal Herriko Erretiratuen eta Pentsiodunen Elkarteak.
Pentsiodunek astelehenero ohikoa duten manifestazioari Kurtzea plazan egin zuten bazkari herrikoiarekin eman zieten jarraipena. Bertan, BINKEk aurreratu zuen bezala, olerki lehiaketa antolatu zuten. Guztira 50 lagunek hartu zuten parte lehiaketan, eta diploma banaketa bazkalostean egin zuten.
Hauek izan ziren irabazleak:
Euskarazko poesian
1. saria: «Ordaindu gabeko lana», PINDAR ezizena, egilea: Ricardo González de Durana
2. saria: «Gauza sinpleak», ezizena: Pentsionistak beti aurrera, egilea: Manuel Rodriguez Fernandez
Gaztelaniazko poesian
1. saria: «Acróstico», ezizena: Aiora, egilea: Marta de los Hoyos
2. saria: «Ez galdu», Erro ezizena, egilea: Lucio R. Regio
Accésit: «Dignidad», ezizena Sara Mago, egilea: Carlos Becerra Villar
Sari banaketaren ostean Gontzal Mendibil kantariak kontzertua ere eskaini zuen, bertakoen txalo eta kantuak batuz.
Gainera, ekitaldian zehar, martxan dagoen Herri Ekimen Legegilea gogoratu zuten. Ekimen horren bidez, 145.000 sinadura baino gehiago bildu dira, eta maiatzaren 15ean entregatuko dira Eusko Legebiltzarrean, «pentsio publiko eta duinen alde» borrokan jarraitzeko asmoz.
