Aurtengo Santakurtzak iragartzeko kartel lehiaketa martxan da

TESTUA: Irati Alonso García
ARGAZKIA: Peio Zamalloa

Aurtengo Santakurtzak iragartzeko kartel lehiaketa martxan jarri du Galdakaoko Udalak. Lanak aurkezteko epea ekainaren 6ra arte egongo da zabalik eta albiste honetan batu dugu parte hartzeko jakin beharrekoa.

Urtero egin ohi duen moduan, Galdakaoko Udalak aurtengo Santakurtzak iragartzeko kartel lehiaketa antolatu du. Lanak aurkezteko epea zabalik dago honezkero eta ekainaren 6ra arte egin daiteke Torrezabal Kultur Etxean dagoen Kultura, Gazteria eta Kirol Arloan, 09:00etatik 14:00etara.

Udalak adierazi duenez, lehiaketak bi modalitate izango ditu: haur eta gazteena —2008 eta 2017 urteen artean jaiotakoak— eta helduena —2008ko urtarrilaren 1a baino lehen jaiotakoak—.

Helduentzako modalitatean irabazleak 1.000 euroko saria jasoko du; bigarren saria, berriz,
400 eurokoa izango da, eta Galdakaoko lehen sailkatuari kopuru hori bera emango zaio. Haur eta gazteen kategorian, saria 100 euroko bonua izango da udalerriko saltoki batean
gastatzeko.

Pertsona bakoitzak gehienez bi obra aurkeztu ahal izango ditu, modu anonimoan, goiburu batekin eta gutunazal itxian. Horren kanpoaldean lanaren goiburu bera eta egilearen jaioteguna agertuko dira, eta barrualdean datu pertsonalak —izena, helbidea eta telefonoa— eta NANaren kopia bat sartu beharko dira.

Hauek dira onartuak izateko lanek izan behar dituzten ezaugarriak:

• Berriak izan beharko dira, beste lehiaketa batean aurretik saririk jaso ez dutenak ezta aldi berean beste lehiaketa batera aurkeztu direnak ere.
• Ezin izango dira diskriminatzaileak izan sexuagatik, genero identitateagatik edo sexu
• orientazioagatik.
• Tamainari dagokionez, 50×70 zentimetrokoak izan behar dute (etzanik ez), eta euskarri zurrun baten gainean muntatu beharko dira. Bestalde, kolorea eta teknika libreak dira, eta kartelek ‘GALDAKAOKO SANTAKURTZAK 2025. IRAILAK 12-21’ lema eraman behar dute.

Bost kidez osatutako epaimahai batek aukeratuko ditu saridunak eta azken erabakia ekainaren 30a baino lehen hartuko da.