Memoria Astea antolatu dute Galdakaoko bonbardaketaren 88. urteurrenaren harira
TESTUA: Irati Alonso García
ARGAZKIA: Peio Zamalloa
Tropa faxistek Galdakao bonbardatu zutenetik 88 urte beteko dira maiatzaren 19an, eta sarraski haren gaineko «memoria ariketa sakona» egiteko Memoria Astea antolatu dute Galdakao Gogora Elkarteak eta Udalak. Hemen batu ditugu eskainiko dituzte ekintza guztiak.
Hogeita zortzi bonbardaketa jaso zituen 1937an Galdakaok tropa faxisten aldetik. Urte horretako maiatzaren 19an hamasei galdakoztar hil zituen faxisten hegazkinek Plazakoetxeko aterpe sarrerara jaurtitako bonba batek eta hauek oroitzeko ekitaldia antolatzen du urtero Galdakaoko Udalak.
Aurten 8 urte betetzen dira sarraski horretatik eta galdakoztarrentzat «berezia» den egun honetan ekitaldia eta lore eskaintza egingo dute Plazakoetxen. Astelehenean izango da, maiatzak 19, 12:00etan.
Baina hori ez da bonbardaketa oroitzeko Galdakao Gogora Elkarteak eta Udalak prestatu duten ekintza bakarra. Gaur, maiatzak 15, eta bihar, ‘Emakumeak 1931-1939’ argazki erakusketa egongo da ikusgai Torrezabaleko erakusketa aretoan, 17:30-21:00 ordutegian.
Bestalde, Maria Gorosarri Euskal Herriko Unibertsitateko irakasle eta ikertzaileak ‘Emakumeen aurkako errepresio faxista’ izeneko hitzaldia emango du bihar Torrezabaleko erakusketa aretoan ere, 19:00etan. Gorosarri Zuzenbidean eta Kazetaritzan lizentziaduna da, eta hainbat hedabidetan kazetari, kolaboratzaile eta komunikazio zuzendari gisa aritu da.
Azkenik, Galdakaoko Burdin Hesira bisita gidatua ere eskainiko dute. Zapatuan izango da eta Kurtzeko plazatik 09:00etan abiatuko dira 7 kilometro inguruko ibilbidea egiteko.
