Ikasturtean zehar egindako lanketak aurkeztuko dituzte ikasleek Udaberriko Lorea jaialdian

TESTUA: Irati Alonso García
ARGAZKIA: Vzp

Bihartik, maiatzak 27, barikura bitarte, Udaberriko Lorea jaialdia hartuko du Torrezabal Kultur Etxeak. Honetan ikasturtean zehar egindako lanketak aurkeztuko dituzte DBHko ikasleek.

Galdakaoko ikastetxeetako Lehen eta Bigarren Hezkuntzako ikasleek sormena eta gaitasun komunikatiboak euskaraz landu dituzte azken urteetan, ondoren ikasturtean zehar landutakoa oholtza gainean erakusteko. Horretarako antolatzen da urtero Udaberriko Lorea jaialdia, eta aurten bihartik, maiatzak 27, barikura bitarte izango da.

Ekimena lau ataletan banatu da, bat jaialdiko egun bakoitzeko. Irakurraldi jarraituarekin hasiko da jaialdia, bihar 11:00etan. Alaine Agirreren ‘Ane’ liburua ahots gora irakurriko dute DBHko ikasleek jendaurrean, urte osoan zehar egin dituzten tailerretan landu bezala. Bertan, Lur Korta, tailer horien koordinatzailea; Alaine Agirre idazlea bera, Leidu irakurketa taldeko kideak, Euskaltegietako ikasleak eta Galdakaoko Udaleko zinegotziak izango dira.

Etzi aldiz 10:00etan, Booktuber eta marrazki lehiaketen sari banaketa ekitaldia izango da. Arene Onaindiak gidatuko du saioa eta Zeinek Daki konpainiaren ‘Destiny Driver’ obra berriaz gozatzeko aukera izango dute bertaratzen direnek.

Eguenean, maiatzak 29, 10:00etan, ikasleek landutako hiru obraz gozatzeko aukera izango da Antzerkhizkuntza Topaketari esker: ‘Dirua galdu, ikasketak irabazi!’, ‘Jumanji Urretan’ eta ‘Kanpamentuko abentura misteriotsua’. Proiektuan parte hartu duten ikasleek diploma bana jasoko dute.   

Azkenik, barikuan Bertsolaritza eta Ahozkotasuna proiektuaren baitako bi emanaldi burutuko dituzte ikasleek 09:30ean eta 11:00etan. Bizkaiko Bertsozale Elkarteak gidatuko du ekimena eta Haizea Telleria eta Maider Altuna bertsolari gazteek ere parte hartuko dute ikasleen topaketan.