Argazkigintza Txokoa gune berria estreinatu du Galdakaok
TESTUA: Irati Alonso García
ARGAZKIA: Galdakaoko Udala
Herritar talde batek argazkilaritzarekin lotutako jarduerak egiteko proiektu bat garatzeko proposamena egin zuen eta hau kontuan hartuz, Argazkigintza Txokoa udal gune berria estreinatu du Galdakaok. Bertan, Click eta Click Galdakaoko Argazkilaritza Elkarteak orain arte Torrezabal Kultur Etxean egiten zuen jarduera garatuko du esaterako.
Argazkigintza Txokoa espazioa estreinatu zuen Galdakaok maiatzaren 27an. Argazkigintza sustatzeko udal gunea da eta herritar talde batek egindako proposamen bat kontuan hartuz abiatu da proiektua. 2023-2024ko aurrekontu parte-hartzaileen prozesuan egin zuten proposamena.
Gune honetan, Zamakoa kaleko 21. zenbakian kokatuta dagoena, Click eta Click Galdakaoko Argazkilaritza Elkarteak orain arte Torrezabal Kultur Etxean egiten zuen jarduera garatuko du, esaterako. Hain zuzen, elkarteko kideak izan ziren inaugurazioan, udal ordezkariekin eta argazkigintzarekiko interesa duten galdakoztarrekin batera. Besteak beste, Iñigo Hernando alkatea, Edurne Espilla Kultura zinegotzia, Santi Amillano Click eta Click elkarteko presidentea eta Eva Naranjo elkarteko batzordeko idazkaria izan ziren hitzorduan.
Espillak adierazi zuenez, «lokal txikia eta xumea izan arren, bertan gauza handiak sor daitezke». Zinegotziak argazkigintzaren artea nabarmendu zuen ere: «Inoiz ez ditugu atera gaur egun adina argazki, baina helburu edo enkoadre zehatzik gabe egiten dugu, ezta transmititu nahi dugunarengan pentsatuz ere. Horregatik, garrantzitsua da argazkigintza mimoz eta beste begirada batekin lantzen duten pertsonek eta elkarteek beren lana erakusteko lokal bat izatea eta haien ezagutza herriarekin partekatzea».
Alkateak «parte-hartze prozesu batetik horrelako kultur ekimen bat ateratzea pozgarria dela» adierazi zuen, eta hau nabarmendu zuen: «Galdakaok duen elkarte sarea oso indartsua da eta horrelako ekimenekin hori bizirik mantentzen jarraitu behar dugu; horrek egiten du herria».
Lokalean egingo den jarduerari dagokionez, «espazio irekia eta dinamikoa, eta argazkigintzaren munduari hainbat alderditatik helduko diona» izango dela azaldu zuten. Zehazki, adierazi zutenez, maila guztietarako prestakuntza ikastaroak, dibulgazio hitzaldiak eta solasaldiak, eta bazkideen eta egile gonbidatuen aldizkako erakusketak antolatuko dira, Galdakaoko argazki artxiboen funts bat sortuko da, baita Click eta Clicken liburutegia partekatzeko gunea ere. Uda ostean aurkeztuko du elkarteak hurrengo ikasturterako proposamena.
