Txomin Egileor kalea berritzeko lanak hasi dira
TESTUA: Irati Alonso García
ARGAZKIA: Galdakaoko Udala
Gaur, ekainak 30, hasi dira Txomin Egileor kalea guztiz berritzeko lanak. Besteak beste, Zuhatzutik Plazakoetxera doan erreia kenduko da eta bidegorria jarriko da.
Auzokideen eskaerei erantzunez eta ingurune seguruagoa, irisgarriagoa eta iraunkorragoa egiteko helburuz, Galdakaoko Udalak guztiz berrituko du Txomin Egileor kalea. Lanak gaur, ekainak 30, hasi dira.
Obra hauei esker Zuhatzutik Plazakoetxeraino doan erreia erabat kenduko da, eta zirkulazioaren noranzko bakarra utziko da, «espazioaren banaketa eraginkorragoa izan dadin».
Obrek irauten duten bitartean, Galdakaoko hirigunera ibilgailuetan sartzeko, Txomin Egileorreko bizilagunek BI-625 errepidera jo beharko dute Basaurirako noranzkoan, eta handik N-634 errepidera sartu Galdakaoko noranzkoan, Iru-Bideko biribilgunea hartuz. Galdabusak ere ibilbide hori egin beharko du; bere ibilbidea pixka bat luzatuko da, baina ez da geralekurik kendu behar izango.
Berregokitze lanak amaitu ondoren, auzokideek Zuhatzu eta N-634 errepideko biribilgune berria lotuko dituen zubitik sartu ahal izango dira Galdakaoko erdigunera. Hala ere, trafikoaren gaineko eragina ezin izango da konpondu zubi horren obra amaitu arte. Ildo horretan, Udala «proiektuak koordinatzeko eta kaltetuei ahalik eta eragozpen gutxien sortzeko lanean ari da, eta hobekuntza guztiek epe luzera izango duten eragin positiboa gogorarazten du».
Bidegorri berria sortu, espaloiak zabaldu eta argiteria hobetu
Zuhatzutik Plazakoetxeraino doan erreia kenduz, errepide ondoko espaloiak zabaldu ahal izango dira, oinezkoak errazago igaro daitezen. Zabalik mantenduko den erreiari dagokionez, asfaltoa berrituko da eta bi zebrabide berri jarriko dira sakaguneekin, horietako bat 20. zenbakiaren aurrean eta bestea 30. zenbakiaren aurrean. Elementu horiek segurtasuna handituko dute, ibilgailuen abiadura murriztuz, baita irisgarritasuna ere, espaloiaren altuera berean joango baitira.
Proiektuaren barnean bidegorri bat ere jarriko da, Plazakoetxetik Hermano Víctor kaleraino joango dena, adinekoen egoitzaren pareraino. Beraz, berritutako tarte osoa zeharkatuko du bidegorriak eta garraio iraunkorragoen erabilera sustatuko da. Era berean, arrapala berri bat eraikiko da Txomin Egileorretik Ibaizabal ibaiaren ertzeraino sartu ahal izateko, ingurune natural horretan aisialdirako espazioa zabalduz.
Aurreikusitako hobekuntzen artean, argiteria publikoko sistema jasangarriagoa, eraginkorragoa eta eguneratua ere instalatuko da, gauean ikuspena hobetuko duena. Eta, azkenik, kalean airetik doazen kableak lurperatzeko aprobetxatuko da esku hartzea, horrela segurtasuna hobetuz eta paisaia ordenatuagoa eta atseginagoa lortuz.
