Maria Casillas igerilariak munduko errekorra hautsi du, 4×100 krol modalitatean
TESTUA: Irati Alonso García
ARGAZKIA: Maria Casillasek bidalitakoa
Asteburuan Espainiako Udako Master Txapelketan antolatu zen eta bertan parte hartu zuen Maria Casillas galdakoztarrak. Igerilariak munduko errekorra hautsi zuen 4×100 krol modalitatean, bere hiru kiderekin batera.
Maria Casillas igerilari galdakoztarrak errekorrak hausten jarraitzen du. Maiatzean Casillasek Europako errekorra hautsi zuen 4×50 errelebo master kategorian, Cristina Mardones, Naia Ibarrondo eta Ane Ibarrondorekin batera.
Oraingoan aldiz, munduko errekorra hautsi du 4×100 krol kategorian, Espainiako Udako Master Txapelketan, Swin Camp Getxoko Mikel Bildosola, Iñaki Bildosola eta Ane Ibarrondo taldekideekin batera.
Laukoteak 3′ 46”67-ko denbora egin zuen. «Txapelketa honetara etortzea erabaki genuenean helburuetariko bat errekor hori zen. Bagenekien zaila geneukala baina mentalizatu ginen eta azkenean irten zen! Beraz, kriston poztasuna sentitu genuen lortzean!», adierazi dio Casillasek BINKEri.
Igerilari galdakoztarrak azaldu duenez, hurrengo astean Bizkaiko txapelketa antolatuko da Zornotzan eta denboraldiari «bukaera on bat ematea» da bere erronka.
