Jose Angel Ligeroren ‘Que baile el Mozoilo’ kartelak iragarriko ditu aurtengo Santakurtzak
TESTUA: Irati Alonso García
ARGAZKIA: BINKE
Jose Angel Ligerok irabazi du aurtengo Santakurtzetako kartel lehiaketa eta honen irudiak iragarriko ditu Galdakaoko jaiak. Guztira 18 kartel aurkeztu dituzte txapelketara.
Irailaren 12tik 21era bitarte ospatuko dira aurtengo Santakurtzak eta eta urtero moduan, hauek iragartzeko kartel lehiaketa jarri zuen martxan Galdakaoko Udalak. Guztira 18 kartel aurkeztuko dituzte txapelketara eta Errioxan bizi den Jose Angel Ligerorena izan da irabazlea, 1.000 euroko sariarekin.
‘Que baile el Mozoilo’ da Galdakaoko jaiak irudikatuko dituen kartelaren izenburua, eta «kolorez betetako diseinuagatik eta herriarekiko duen sinbolismoagatik» nabarmentzen da.
Kartela epaimahaiburuak, Jai Batzordeko bi emakumek, tokiko diseinatzaile batek eta komunikazioko profesional batek osatutako epaimahaiak aukeratu du. Horien ustez, besteak beste, «kartel irabazleak egun horietan biziko den jai giroa irudikatzen du bere ikonoaren bidez, mozoiloa. Zentzu horretan, konposizioak mugimendu, erritmo eta energia sentsazioa transmititzen duela baloratu du, aurkeztutako beste obra batzuen estatismoa hautsiz».
Gainontzeko proposamenei dagokienez, Udalak nabarmendu du edizio honetan homogeneizazio handia antzeman dela aurkeztutako kartelen konposizioan; izan ere, «gehienak oso simetrikoak izan dira eta tipografia oso konbentzionalak erabili dituzte, teknologia digitalen erabilera dela eta».
Bigarren saria, 400 eurokoa, Oihane Basterretxea galdakoztarrarentzat izan da, ‘Santakurtzak jaigiroan’ lanagatik. Basterretxeak ‘Mozoilo jaie’ lanarekin hirugarren postua ere lortu du. Beraz, lehen galdakoztarra izanik, bere bigarren lanagatik 400 euroko saria irabazi du.
Bestalde, epaimahaiak haur eta gazteen kategorietara aurkeztutako kartelak ere aukeratu ditu. Kategoria horietara 2008 eta 2010 urteen artean, 2011 eta 2014 urteen artean eta 2015 eta 2017 urteen artean jaiotako gazteak aurkeztu dira.
Carla Iñiguez barakaldarra izan da garaile lehen tartean ‘¡Diversión y alegría!’ lanarekin, Naia Carcamo galdakoztarra bigarrenean ‘Herriko jaiak’ lanarekin eta Aiala Carcamo galdakoztarra hirugarrenean ‘Koloretako jaiak’ lanarekin. Hiru gazteek Galdakaoko saltoki batean gastatzeko 100 euroko bonua irabazi dute.
