Aperribai kaleko trafikoa semaforo bidez arautuko da, laugarren igogailuaren obren parean

TESTUA: Irati Alonso García
ARGAZKIA: Galdakaoko Udala

Aperribaiko laugarren igogailuaren obretan harkaitza topatu dute langileek eta honen ondorioz errei bat itxi behar izan dute. Hortaz, datozen asteetan, semaforoen bidez arautuko da errepide horretako autoen zirkulazioa.

Desnibel handiko auzoa da Aperribai eta adineko pertsona asko bizi dira bertan. Horregatik, hauen bizi-kalitatea hobetzeko helburuz, igogailuak eraikitzen ari da Galdakaoko Udala.

Laugarren igogailua ezartzeko obrak pasa den hilabetean hasi ziren eta indusketa lanetan zehar ezusteko bat sortu da: langileek harkaitza aurkitu dute lurpean. Honek, Aperribai kaleko errepideko errei bat aldi baterako ixtea eragin du.

«Izan ere, oztopo hori txikitzeko eta kentzeko prozesuak makineria berezia eta denbora gehiago beharko du. Ondorioz, obraren hasierako plana aldi baterako aldatu da, baina oraingoz ezinezkoa da zehaztea zenbat iraungo duten lan horiek», adierazi dute Udaletik.

Hortaz, gaurtik aurrera eta datozen asteetan, semaforoen bidez arautuko da errepide horretako autoen zirkulazioa. Ez da bestelako desbideratzerik egin behar izango, eta «gidarien zein profesionalen segurtasuna bermatuta egongo da».

Udalak «bizilagunei eta gidariei pazientzia eskertzen die, eta obra behar bezala egiteko beharrezko jarduera dela gogorarazten du. Langileak saiatzen ari dira eragozpenak ahalik eta gutxien izan daitezen».