Biodibertsitatearen garrantziari eta beste ingurumen arazo batzuei buruzko sentsibilizazio kanpaina bat antolatzen ari dira Galdakaoko ikasleak. Edurne Espilla jarduneko alkateari eta Ainara Tellaetxe Ingurumen teknikariari aurkeztu zioten pasa den astean.
Ekainean Galdakaoko Udalak Agenda 2030 programan parte hartzen duten herriko ikastetxetako ikasleak hartu zituen. Urtero bezala, ikasturtean landutako edukia aurkeztu zieten Iñigo Hernando alkateari eta Ainara Tellaetxe Ingurumen teknikariari.
Bilera horretan, parte hartzaileek zazpi proposamen aurkeztu zituzten Galdakaoren ingurumenarekiko jasangarritasuna eta errespetua hobea izan dadin. Horrez gain, ekintza eraldatzaile bat ere aurkeztu zuten: hiriko biodibertsitatearen garrantziari eta beste ingurumen arazo batzuei buruzko sentsibilizazio kanpaina bat antolatzea.
Ikasturte hasieratik aritu dira kanpaina horretan lanean, eta egindako aurrerapenen berri eman zieten abenduaren 5ean udaletxeko areto nagusian Tellaetxeri eta Edurne Espilla jarduneko alkateari.
Biek «jakinmin handiz» jarraitu zuten gazteak egiten ari diren lanaren garapena, «udal ekintzetan txertatzeko ideia interesgarriak aurkezten baititu».
Espillak azpimarratu zuenez, «naturarekin harreman egokia izan behar dugu, eta eskaintzen dizkigun iturri guztiak ondo zaindu». «Lan hori guztion ardura da, eta modu kolektiboan lortu beharreko helburua», esan zuen, beraz, ikasleak prestatzen ari diren kanpainak «herritarrengan eragin positiboa izatea» espero dela adierazi zuen.
Tellaetxek, bestalde, Udalak «aurreko bileratik eratorritako etxeko lanak bete dituela» adierazi zuen, eta zenbait adibide zehatz aipatu zituen: Galdakaoko kaleetan zuhaitz gehiago landatzea, herriko landare eta animalien zaintza hobetzea eta naturaren errespetua eta zaintza sustatzeko informazio kanpainak diseinatzea. Horietan guztietan azken hilabeteetan «aurrerapauso handiak» eman direla berretsi zuen.
Ikasleen txanda iritsita, ikastetxeetan eguzki plakak jartzeko aukera planteatu zuten. Udaletxeko ordezkariek esan zutenez, «hori da jarraitu beharreko bidea, eta dagoeneko horrelako proiektuak martxan daude». Gainera, indarrean dagoen araudiak eraikin publikoetan berriztagarriak diren energiak ezartzea eskatzen duela gogorarazi zuten. Ildo horretan, Udala garatzen ari den planta fotovoltaiko baten proiektua aipatu zuten, eta, aurreratu zutenez, hurrengo urteetan hori egia bihurtzea aurreikusten da.
Guztia kontuan hartuta, Galdakaoko Udalak ingurumenari buruzko hezkuntzarekiko eta hezkuntza komunitatearen parte hartze aktiboarekiko duen konpromisoa berretsi zuen. Espillak eta Tellaetxek gazteek egindako lana eskertu egin zuten, baita ingurunea hobetzeko erakutsi zuten konpromisoa ere, «haien ekarpenak herri jasangarriagoa eraikitzeko funtsezkoak» direla azpimarratuz.
Saioa amaitzeko, elkarrekin lanean jarraitzeko konpromisoa berretsi zen, Agenda 2030aren esparruan ikastetxeekin elkarlana eta elkarrizketa irekita mantenduz, Galdakao berdeago, kontzienteago eta ingurumenarekiko errespetutsuago baterantz aurrera egiteko helburuarekin.
