Balio feministetan eta gaurkotasunari buruzko begirada kritikoan oinarritutako Kolpez Kolpe telebista saioa agertokietara eramango da. Galdakaon izango da estreinaldia bihar, martxoak 26.
Umorearekin eta gaurkotasunarekin lotutako Kolpez Kolpe. Zuzenean ikuskizuna estreinatuko da bihar, martxoak 26, Torrezabal Kultur Etxean.
Lan osoa emakumeek sortu, ekoitzi, zuzendu eta aurkezten dute. Ordu eta erdiko iraupenarekin, ikuskizunak Kolpez Kolpe Hamaika Telebistako saioaren espiritu bihurri eta sarkastikoa zuzenean ikusteko aukera eskainiko du.
Bost denboraldi eta mila orduko telebista ekoizpena gainditu ondoren, proiektua agertokietara eramango da eta Galdakaon egingo da lehen aldiz, «inolako iragazkirik gabe».
Euskarazko late show formatuan aurkeztutako ikuskizunak balio feministetan eta gaurkotasunari buruzko begirada kritikoan jartzen du fokua, emakumeek osatutako taldea buru duela. Aurkezleak Ekhiñe Atorrasagasti, Naroa Iturri eta Beatriz Egizabal dira, eta gonbidatu bereziak Nayua Adih, Yogurinha Borova, Onintza Enbeita, Bea Ilardia eta Jule Goikoetxea.
Saioa 19:00etan izango da, eta sarrera doakoa izango da edukiera bete arte. Udalak bertaratzeko eta ikuskizun interesgarria zuzenean bizitzeko gonbita egin die herritarrei: «Bertan umorea, sormena eta balio feministak uztartzen dira euskaraz aurkeztutako formatu berritzailean».
