Ganguren Mendi Taldeak, Galdakaoko Udalaren laguntzarekin, herriko mendi ibilbide sarea eta inguruko xenda nabarmenak batzen dituen gida argitaratu du. Lana «urteetako lan kolektiboaren fruitua da».
Urteetako lan kolektiboaren fruitu den liburuxka berria argitaratu du Ganguren Mendi Taldeak, Galdakaoko Udalaren laguntzarekin. Lanak «herriko ingurune naturala ezagutarazteko eta seinaleztatzeko» helburua du.
Gidak ibilbide ezberdinen mapak jasotzen ditu, Ganguren, Arrizuriaga, Artetagana eta Kukuzburukoak adibidez, eta kirolarientzat garrantzitsuak diren datu praktikoak eta informazio zehatza eskaintzen ditu, hala nola luzera, zailtasun maila, malda, aholkuak eta hainbat bitxikeria.
Argitalpena martxoaren 30ean aurkeztu zen udaletxean. Bertan, Ganguren Mendi Taldeko lehendakari Eduardo Oleak eta erakundeko idazkari Ane Alvarezek Udaldeko Kirol zinegotzi Asier Kortarekin batera argazki ofiziala egin zuten, «proiektuaren garrantzia eta aldeen arteko lankidetza irudikatuz».
Ekimen kolektiboa
Proiektua Galdakaoko zenbait herritarrek eta klubeko kidek bultzatu zuten, duela urte batzuk seinaleztatutako ibilbideak sustatzen hasi zirenean. 2012an Ganguren Mendi Taldeko zuzendaritzak onartu zuen proposamen bat prestatu zen, eta gerora, 2020an Udalarekin lankidetza hitzarmen bat egin zen, egitasmo horren garapena ahalbidetu zuena.
Proiektua faseka egin da, eta ordutik argitalpen berri honetan jasotzen den bide sarea egonkortzen joan da. Halaber, dokumentuak beste proposamen batzuk ere jasotzen ditu, hala nola Altamira Ibilbidea eta Burdin Hesiko ibilbidea, udal esparrutik bultzatuak.
Guztira 1.000 ale inprimatu dira, eta udaletxean eta Ganguren Mendi Taldearen egoitzan herritarrentzat eskuragarri dago.
Protagonistek azaldu dutenez, «proiektua ez da hemen gelditzen». Etorkizunera begira honako proiektuekin jarraitzeko asmoa du mendi taldeak: «Ibaizabal ertzetako eta adarretako ibilbideen seinaleztapena, herriko beste eremu batzuetara zabaltzea, eta ondasun kulturalak berreskuratzea, hala nola euskal labe tradizionalak».
Ganguren Mendi Taldeak proiektuan parte hartu duten pertsona eta erakunde guztiei eskerrak eman dizkie, baita aurreko lanean parte hartu dutenei ere, ekimena errealitate bilakatzeko aukera eman baitu. Udalak, bere aldetik, herritarrak animatu ditu halako ekimenetan parte hartzera, eta etorkizunean «Galdakaoko ingurune naturalaren balioa handitzen jarraitzeko proposamen berriak garatzen laguntzera».
