Etorkizunean herrian zarataren eta bibrazioen aurkako babesa arautuko duen ordenantza prestatzeko bidean, jendaurreko aurretiazko kontsulta prozesua ireki du Galdakaoko Udalak. Ekarpenak egiteko epea zabalik dago Udalaren webgunearen bitartez.
Galdakaoko Udala herrian zarataren eta bibrazioen aurkako babesa arautuko duen ordenantza prestatzen ari da, eta horretarako jendaurreko aurretiazko kontsulta prozesua ireki du.
Ekarpenak egiteko epea zabalik dago maiatzaren 20ra bitarte, eta proposamenak Udalaren webgunearen bidez aurkeztu daitezke.
Kontsulta horren helburua «herritarren, elkarteen eta eraginpean egon daitezkeen eragileen iritzia jasotzea da, ordenantza proiektua idazten hasi eta ondorengo izapidetze prozesuari ekin aurretik».
Araudi berriak aldiz, «bizilagunen atseden eskubidea eta entzumen kalitate egokia herriko jarduera ekonomiko, kultural eta sozialarekin bateragarri egitea» du helburu.
Zentzu horretan, Udalaren asmoa da «zarata eta bibrazioek eragindako kutsadura akustikoa ahal den neurrian murriztea, Galdakaoko errealitate sozial, kultural eta ekonomikoa kontuan hartuta».
Etorkizuneko ordenantzak zarata mugak, isolamendu baldintzak, udal ikuskapen gaitasuna eta zehapen prozedura, arautzeko esparru argia ezarriko du, besteak beste, ingurumen kalitate egokia eta bizikidetza orekatua bermatzeko helburuarekin.
Udalak «beharrezkotzat jotzen du ordenantza honen onarpena zaratari buruzko araudiaren ulermen bateratu eta errazagoa izateko, gaur egun hainbat mailatan sakabanatuta baitago —Europako, estatuko eta autonomia erkidegoko araudietan—».
Horrek interpretazio zailtasunak sor ditzake herritarrentzat eta gizarte, ekonomia zein kultura arloko eragileentzat. Horregatik, Udalak «herrian zarataren emisioarekin eta murrizketarekin lotutako alde guztiak modu argian antolatzeko udal araudi propio baten aldeko apustua egin du».
