Aperribai auzoan kokatuta dagoen haurrentzako jolas parkea berritzeko lanak amaitu ditu Galdakaoko Udalak. Zehazki, segurtasuneko zorua eta kanpoko hesia ordezkatu ditu, eta jolas berriak instalatu ditu.
Aperribaiko haurren jolas parkea berritzeko lanak amaitu zituen Galdakaoko Udalak abuztu hasieran. Jarduketa horren ondorioz, aisialdirako gune hau erabat eguneratu da, eta «auzoko haurrek zein familiek espazio seguruagoa eta atseginagoa izango dute aurrerantzean».
Esku hartzearen bidez, urteetako erabileraren ondorioz nabarmen hondatuta zegoen parkea erabat berritu da. Egindako lanen artean, segurtasuneko kautxuzko zorua eta kanpoko hesia aldatu dira, eta aurretik zeuden jolasak kendu eta jolas berriak instalatu dira.
Horrela, «parke modernoagoa, seguruagoa eta gaur egungo beharretara egokitua sortu da, haur eta familiei kalitate handiagoko eta erabiltzeko erosoagoa den gunea eskainiz».
Horrez gain, informazio panel berri bat ere jarri da. Bertan, jolas bakoitzerako gomendatutako adin tarteak (1-7 urte, 3-5 urte, 5-12 urte eta +3 urte) adierazten dira, baita Udalaren herritarren arretarako telefonoa (944 010 500) eta larrialdi zerbitzuen zenbakia (112) ere. Era berean, panelak txakurrak haurren jolasgunera sartzea debekatuta dagoela gogorarazten du, espazioaren segurtasuna bermatzeko.
Udalak azaldu duenez, parkea berritzeko lanak UNE-EN 1176 eta UNE-EN 1177 arauen arabera egin dira. Horiek haurren jolasguneen eta horien segurtasun zoruen baldintzak ezartzen dituzte.
Jarduketa honen bidez, Udalak «herriko espazio publikoak hobetzen jarraitzen du, haur eta familien eskura jolasgune modernoagoak, seguruagoak eta kalitate handiagokoak jarriz, auzoetako bizi kalitatea eta bizikidetza indartzeko».
