Ezbeharra
BINKE / 2021eko maiatza

Bizkaibuseko gidari bat labankadaz zauritu dute Galdakaon

TESTUA: Erredakzioa
ARGAZKIA: ezezaguna

Gidariak autobusera igo gura zuen erabiltzaile bati musukoa janzteko eskatu zion igandean, eta honek ezetz esan ostean zauritu zuen gidaria arma zuri batekin. Onik dago gidaria, baina «kasu bakana» ez delakoan, elkarretaratzera deitu du ELAk ostegunerako Bilbon, «gidariak babesgabe» daudela salatzeko.

Bilbo-Eibarko 3912 linean, Galdakaoko geltoki batean autobusera musuko barik igo gura zuen herritar bati maskara janzteko eskatu zion gidariak igandean 08:30 aldera. Erabiltzaileak ezetz esan ostean arma zuri batekin erasotu eta zauritu zuen langilea.

ELA sindikatuak gaur eman du ezbeharraren berri, gaur jakinarazi baitio gidariak gertatutakoa euskal sindikatuari. Sindikatuko kide batek Binkeri adierazi dio «gidaria urduri dagoela, baina ez larri».

Langileen defentsaren arabera, ez da kasu bakana izan, «Bizkaibuseko gidarien aurkako erasoak areagotu egin direlako osasun krisia hasi zenetik». ELAk salatu egin du gaur, asteartea, «gidariak babesgabe daudela» eta gogor kritikatu ditu enpresa emakidaduna eta Bizkaiko Foru Aldundia, «egoera horien aurrean jarduteko protokolorik ez ezartzea» leporatuta.

Salaketa hori kalera eramateko asmoz, ELAk elkarretaratzera deitu du ostegunerako Bilbon, maiatzak 6, Bizkaiko Foru Aldundiaren egoitza nagusiaren aurrean 10:30ean.