Dantzaren Nazioarteko Eguna ospatuko du Galdakaok zapatuan
TESTUA: Irati Alonso García
ARGAZKIA: Peio Zamalloa
Apirilaren 29an Dantzaren Nazioarteko Eguna ospatuko da eta honekin bat egingo du Galdakaok ere. Horretarako, zapatuan, hilak 27, hainbat ekintza antolatuko dira herrian.
Beste urte batez, Dantzaren Nazioarteko Eguna ospatuko da apirilaren 29an eta munduko hainbat txoko erritmoz beteko dira eguna ospatzeko. Galdakaok ere bat egingo du hitzordu berezi honekin.
Kasu honetan zapatuan, hilak 27, antolatuko dituzte Dantzaren Nazioarteko Egunaren harira ekintzak, Galdakaoko Udalak jakinarazi duenez.
Goizean hasiko dira saioak, zehazki 12:00etan, Mugurun. Bertan ballet modernoaren erakustaldia ikusi ahal izango da, eta dantzaren onurak probatzeko aukera ere izango dute herritarrek. Ondoren, dantza kalejira egingo da Santi Brouard plazaraino.
Jarraian, 12:45ean, Santi Brouard plazan, dantza pieza txikien erakustaldia eskainiko dute Divenire dantza eskolako ikasleek.
Azkenik, Ana Capillak ‘Musika kutxatxoa’ ikuskizuna eskainiko du Aperribaiko frontoian 18:00etan, familiei zuzendutako saioan.
